Report.az
Futzal üzrə Azərbaycan millisinin qapıçısı Rövşən Hüseynli "Birbaşa Bakı" minifutbol komandasında köməkçi məşqçi kimi fəaliyyət göstərir, eyni zamanda, formadan düşməmək üçün məşq edir.
35 yaşlı qolkiper bunu "Report"a açıqlamasında deyib.
O, bir sıra futzalçıların da hazırda klubsuz qaldığını vurğulayıb:
"Gələcəyimlə bağlı hələ qərar verməmişəm. Bunu təkcə özümə şamil etmirəm, bütün oyunçular boşdadır. Çünki çempionatın formatı, klubların sayı bəlli deyil. Qərar gözləyirik. Hazırda "Birbaşa Bakı" komandasında həm məşqçilik edirəm, həm də özümü formada saxlamaq üçün hazırlaşıram".
Təcrübəli qolkiper xaricdən təkliflər alsa da, ailə şəraiti və yerli birincilikdəki qeyri-müəyyənlik səbəbindən bu variantları dəyərləndirmədiyini diqqətə çatdırıb:
"Xaricdən təkliflər var idi, lakin hazırda ailə vəziyyətim buna imkan vermir. Övladlarımın təhsili ilə əlaqədar legioner həyatı yaşamaq imkanlarını dəyərləndirmədim. Son 3 ayda futzal millisinin bir neçə üzvü minifutbola keçib".
Qeyd edək ki, R.Hüseynli son olaraq futzal üzrə Azərbaycan Yüksək Liqasında "Araz-Naxçıvan"ın formasını geyinib.
