“Qırmızı iblislər”in Almaniya səfəri - TƏQDİMAT

Bu yay bütün Avropanın diqqəti Almaniyaya yönələcək. Qitənin 24 ən güclü millisi sayca 17-ci Avropa çempionatında mübarizə aparacaq. İyunun 14-dən iyulun 14-dək davam edəcək yarışın startına 11 gün qalıb.

İdman.biz AVRO-2024-ün iştirakçılarının təqdimatını davam etdirir.

Bu həftə E qrupunun komandalarını nəzərdən keçirəcəyik. Qrupun favoriti olan Belçika yığması çempionatda da uğur qazanmağa namizədlər sırasındadır.

Millimizin Almaniyaya yolda saldığı komanda

"Qırmızı iblislər" AVRO-2024-ə ən erkən vəsiqələrdən birini qazanıb. Onlar Fransa və Portuqaliya kimi oktyabrın 13-də, seçmə mərhələnin sonuna üç tur qalmış Almaniyaya bilet əldə edib. Azərbaycan millisinin də yer aldığı qrupda çıxış edən Domeniko Tedeskonun yetirmələri tsikli məğlubiyyətsiz 1-ci yerdə başa vurublar. Düzdür, Belçika əsas rəqibləri Avstriya və İsveçlə ev matçlarında heç-heçə edib. Amma səfərdə "qırmızı iblislər" xal itkisi nə olduğunu bilməyib. Tedeskonun komandası Bakıda 1:0 hesablı qələbə ilə başladığı seçmə mərhələni məhz millimizlə oyunla yekunlaşdırıb. Formal xarakter daşıyan qrup birincisi olmaq üçün mübarizə aparan Belçika Almaniyaya getməzdən öncəki son rəsmi matçında komandamıza 5 cavabsız qol vurub. Bunun da dördünə Romelu Lukaku imza atıb.

"Qızıl nəsil" qızıl arzusunda

Belçika futbolunun "qızıl nəsli"nin bəzi üzvləri ya karyerasını, ya millidəki çıxışını başa vursalar da, hələ də ulduz bolluğu müşahidə olunur. Romelu Lukaku qolları, Kevin de Bruynenin assistləri, Tibo Kurtuanın qurtarışları istənilən komandaya uğur üçün lazım olan elementlərdir. Belçikalı azarkeşlər də hələ titul ümidini itirmədiyindən Almaniyada böyük uğur arzusundadırlar. İndiyədək 6 dəfə Avropa çempionatlarının final mərhələlərinə qatılan "qırmızı iblislər" son iki turnirdə 1/4 finalda dayanıb. AVRO-1980-nin gümüş, AVRO-1972-nin bürünc mükafatı isə çox keçmişdə qalıb. Qatıldığı 14 mundialdakı qazancı iki yarımfinal olan Belçika 2018-ci ildə bürünc, 1986-cı ildə dördüncü yerlə kifayətlənib.

Belçika millisinin qrupdakı oyunları:
17 iyun. Belçika - Slovakiya
22 iyun. Belçika - Ukrayna
26 iyun. Ukrayna – Belçika

Qeyd edək ki, E qrupunun görüşləri 5 fərqli şəhərdə - Ştutqart, Frankfurt, Köln, Münhen və Düsseldorfda keçiriləcək.

Vüqar Xeyrullayev
İdman.biz