Bəxtsiz “Lokomotiv” - TƏQDİMAT

Bu yay bütün Avropanın diqqəti Almaniyaya yönələcək. Qitənin 24 ən güclü millisi sayca 17-ci Avropa çempionatında mübarizə aparacaq. İyulun 14-dək davam edəcək yarış sabah start götürəcək.

İdman.biz AVRO-2024-ün iştirakçılarının təqdimatını bu gün başa çatdırır.

Təqdim edəcəyimiz sonuncu komanda Çexiya millisidir. "Xalq komandası" F qrupunda favorit Portuqaliya, qardaş Türkiyə və qonşu Gürcüstanla mübarizə aparacaq.

Darmadağınla bilet
Çexiya AVRO-2020-yə vəsiqəni seçmə mərhələdən qazanıb. Yaroslav Şilqavının yetirmələri Albaniya, Polşa, Moldova və Farer adaları ilə eyni qrupda mübarizə aparıb. Əsas rəqiblərindən biri Polşanı startda məğlub edən çexiyalılar tsikli heç də yaxşı keçirməyib. Səfərdə cəmi bir qələbəsi olan komanda taleyini son tura saxlayıb. Moldova ilə evdəki görüşdə qalib gəlməli olan "Lokomotiv" 3:0 hesablı darmadağınla Almaniya biletini əldə edib. Amma 15 xalla qrup ikincisi olan yığmanın baş məşqçisi tsikl bitən kimi istefa verib. Bu ilin yanvarında İvan Qaşek milliyə qayıdıb. O, 15 ildən sonra komandanın sükanı arxasına keçib.

"Qızıl qol"la "Gümüş qol"un qurbanları
Çexiya millisi Avropa çempionatlarının final mərhələlərinin daimi iştirakçısıdır. Çexoslovakiya bölündükdən sonra yarışdan kənar qalmayan "Xalq komandası" ən böyük uğurunu ilk cəhddə qazanıb. AVRO-1996-da Çexiya finalda Berti Foqtsun Almaniyasına uduzub – 1:2. 8 il sonra yarımfinala qədər irəliləyən "Lokomotiv"i gələcək çempion Yunanıstan dayandırıb – 0:1. Hər iki turnirdə Çexiya həlledici topu əlavə vaxtda buraxıb. AVRO-1996-da "Qızıl qol", səkkiz il sonra isə "Gümüş qol" qaydası işlədiyindən Oliver Birhoff və Trayanos Dellas çexlər üçün "qatil" rolunu oynayıblar. Maraqlıdır ki, Birhioff tarixə "Qızıl qol"un ilk, əlavə vaxtın ilk yarısının uzatma dəqiqəsində fərqlənən Dellas isə yeganə müəllifi kimi düşüb. Bu da çexlərin bəxtsizliyini göstərir. AVRO-2012 və AVRO-2020-də 1/4 finala yüksələn yığmanı öncə Danimarka, ardınca Portuqaliya dayandırıb. Yeddi dəfə final mərhələsində oynayan Çexiya digər üç cəhdindən qrupda qalıb.

Çexiya millisinin qrupdakı oyunları:
18 iyun. Portuqaliya - Çexiya
22 iyun. Gürcüstan - Çexiya
26 iyun. Çexiya – Türkiyə

Qeyd edək ki, F qrupunun görüşləri 4 fərqli şəhərdə - Hamburq, Helzenkirhen, Dortmund və Leypsiqdə keçiriləcək.

Vüqar Xeyrullayev
İdman.biz