Uşaqların Beynəlxalq Müdafiəsi Gününə həsr olunan tədbirlər çərçivəsində "Uşaqlar idmanı sevir" festivalı baş tutub.
İdman.biz xəbər verir ki, Gənclər və İdman Nazirliyinin təşkil etdiyi tədbir Dənizkənarı bulvarda baş tutub.
Kukla teatrının arxasında gerçəkləşən festivalda azyaşlı pəhləvanın çıxışı diqqət çəkib. 12 yaşlı Əli Muxtarov dişləri ilə avtomobili dartıb.
"Lada-Kalina" markalı nəqliyyat vasitəsinə bağlanan kanatı dişləri ilə çəkən pəhləvan uğurunun sirrini də açıqlayıb: "Bu idman növü ilə uşaqlıqdan məşğul olmağa başlamışam. Ata və baba tərəfdən nəslimizdə pəhləvanlar olub. Buna bir neçə il hazırlaşmışam. Amma məni daha çox cüdo cəlb edir və bu növlə məşğulam. Hidayət Heydərov və Rüstəm Orucov kimi olmaq və bir gün olimpiya çempionluğu qazanmaq istəyirəm".
Muxtarov onu da qeyd edib ki, hazırda bir neçə layihəyə də hazırlaşır. Bunların gerçəkləşməsi bir neçə ilə çəkə bilər.
İdman.biz