Idman.biz
Azərbaycan Karate Federasiyasının rəhbərliyi və "KWU-WFKF" birliyinin təşkilatçılığı ilə 28 May – Respublika Günümünasibətilə full kontakt karate üzrə ümumrespublika seminarı uğurla təşkil olunub.
İdman.biz xəbər verir ki, tədbirə ölkənin müxtəlif bölgələrindən 400-ə yaxın karateçi qatılıb.
Seminar Azərbaycan Respublikasının Dövlət Himni ilə başlayıb və Vətən uğrunda canını fəda etmiş şəhidlərimizin xatirəsi bir dəqiqəlik sükutla yad edilib.
Tədbirin rəsmi açılışında çıxış edən Azərbaycan Karate Federasiyasının vitse-prezidenti Füzuli Musayev, AKF prezidenti adından iştirakçıları salamlayaraq deyib ki, 28 May Respublika Gününə həsr olunmuş möhtəşəm seminarda bir araya gəlmək böyük şərəfdir: "Azərbaycan Respublikasının müstəqilliyi hər birimizin qürur mənbəyidir. Biz bu müstəqilliyin qorunması və inkişafı üçün yalnız cəbhədə deyil, idmanda da öz töhfəmizi verməliyik. Karate – yalnız idman deyil, həm də bir həyat tərzidir. Bu sənət vasitəsilə biz gənclərimizə həm mənəvi, həm də fiziki güc aşılamaqdayıq.
Azərbaycan Karate Federasiyası olaraq məqsədimiz təkcə idman uğurları deyil, həm də sağlam, vətənpərvər gənclərin yetişməsinə dəstək olmaqdır. Bugünkü seminarda iştirak edən hər bir karateçini təbrik edir, uğurlar arzulayıram. Müstəqilliyimiz daim olsun".
Ardınca çıxış edən AKF -in baş katibi və "KWU-WFKF" birliyinin sədri Qabil Sayadov, tədbirin təşkilində göstərilən dəstəyə görə federasiya rəhbərliyinə və iştirakçılara təşəkkürünü bildirib. O, belə seminarların gənc idmançıların inkişafı və beynəlxalq arenada ölkəmizi layiqincə təmsil etmələri baxımından mühüm əhəmiyyət daşıdığını vurğulayıb.
Seminarın praktiki hissəsi təşkilat nümayəndələri Hamlet Əlili, Rza Mustafayev, Vidadi Xəlilov, Rasim Oqniev, Anar Məmmədov və digər təcrübəli mütəxəssislərin rəhbərliyi ilə həyata keçirilib. Məşqlər zamanı iştirakçılara müxtəlif texniki və taktiki elementlər öyrədilib, yeni metodik yanaşmalar tətbiq olunub.
Tədbirin sonunda 100 -ə yaxın karateçi müxtəlif kyu dərəcələri üzrə imtahan verərək öz bilik və bacarıqlarını nümayiş etdiriblər. İmtahanlar peşəkar hakim heyəti tərəfindən obyektiv şəkildə qiymətləndirilib.
Azərbaycan Karate Federasiyası bildirir ki, bu kimi tədbirlər gələcəkdə də ardıcıl olaraq davam etdiriləcək və ölkə üzrə karate idman növünün bütün üslublarının inkişafına hərtərəfli dəstək göstəriləcək.
İdman.biz
