Məhəmməd Abdullayev: "Yazırdılar ki, legionerəm, Çeçenistandan gəlmişəm" - MÜSAHİBƏ

Qazaxıstandakı Dünya Kubokunda bürünc medal qazanan Azərbaycan milli komandasının boksçusu və kapitanı Məhəmməd Abdullayevin Teleqraf-a müsahibəsi

- Dünya Kubokunda qızıl medal qazanmağınıza nə mane oldu?

- Yeni yaradılan Dünya Boksu (World Boxing - red.) təşkilatının ilk turnirinə qatılmışdıq. Çox güclü yarış idi. Dünyanın hər yerindən boksçular var idi, deyərdim ki, yarış dünya çempionatı səviyyəsində təşkil olunmuşdu. Uşaqların hamısı yaxşı döyüşdü. Özüm yarışa getdiyim gün xəstələnmişdim, səhhətim yaxşı deyildim. Bir az zəifləmişdim. Amma döyüşlərimi keçirdim, səhhətim mənə problem olmadı.

- Komandanın kapitanı olaraq digər boksçuların çıxışı barədə nə deyə bilərsiniz?

- Üç bürünc qazandıq, amma bunu qızıl da edə bilərdik. Sadəcə, ilk dəfə idi yarışırdıq deyə hakimləri də tanımırdıq. Tanımadığım hakim rinqdə idi, nə etmək istədiyini tuta bilmirdik (gülür - red.). Döyüşü saxlayıb mənə xəbərdarlıqlar edirdi. İndiyənə kimi xəbərdarlıq almamışdım. Hakimlər bir az xam idilər. Bizi də tanımırdılar. Məncə, növbəti turnirdə "bürünc"ləri "qızıl"a çevirə biləcəyik. Uşaqların hamısı yaxşı vuruşdu, orada pis döyüşən olmadı. Onlar əllərindən gələni etdilər, sonadək vuruşdular. Həm də ora tam komanda ilə getməmişdik. 2-3 boksçu bizimlə deyildi.

- Getməyənlərdən biri dünya çempionu, Avropa Oyunlarının qalibi və olimpiya mükafatçısı Alfonso Dominges idi. O, hazırda komandadadır?

- Deyəsən, komandadadır. Bu barədə məlumatım yoxdur, yalan deyərəm. Bizimlə məşq edir, amma yarışlara kimlərin gedəcəyini rəhbərlik və məşqçilər təyin edir. Dominges barədə daha dəqiq məlumatı rəhbərlik bilir.

- Artıq bir neçə baş məşqçinin rəhbərliyi altında çıxış etmisiniz. Yeni baş məşqçi Ravşan Xocayevin gəlişi nəyi dəyişdi?

- Hər bir baş məşqçinin özünə məxsus üslubu var. Hərəsi bir ölkədən idi. Kubalı Umberto Orta və Pedro Roke var idi, indiki özbəkistanlıdır. Özbəkistan boksu da hamıya məlumdur.Baş məşqçimizin özünəməxsus nizam-intizamı var. Yaxşıdır, heç birimizin narazılığı yoxdur. Hamımız ondan razıyıq.

- Hansı dildə ünsiyyət qurursunuz?

- Rusca danışırıq, amma özbək dili bizim dilə oxşardı. Bəzi sözləri başa düşürük.

- Paris-2024 Yay Olimpiya Oyunlarında Özbəkistan boksçuları uğurlu çıxış etdilər. Ümumilikdə bu idman növündə 5 qızıl medal qazandılar. 92 kq çəki dərəcəsində yarışan Azərbaycan təmsilçisi Alfonso Dominges də finalda özbəkistanlı Lazizbek Mullojonova yenildi. Onların nəticələri sizin üçün sürpriz oldumu?

- Tokio-2020 Yay Olimpiya Oyunlarında bir qızıl medalları olmuşdu. Bilmirəm nədir, işləyirlər də... Söhbət təkcə boksdan getmir, onlar hərtərəfli işləyirlər. 5 qızıl medal qazanmaq asan iş deyil. Təkcə boksda deyil, bütün idman növlərində inkişaf edirlər.

- Bir müddətdir Azərbaycan boksunda yuxarı çəki dərəcəsində idmançı qıtlığı var idi. Sizi də ilk zamanlar dağıstanlı olduğunuzu bilirdilər...

- Tokio-2020 olimpiadasında ilk qələbəmdən sonra yazırdılar ki, legionerəm, Çeçenistandan gəlmişəm (gülür - red). Dostlarım da yazırdılar ki, Məhəmmədin xəbəri var? Əslim Zaqataladandır. Düzdür, orada başqa millətlər - avar, saxur, inqloylar da yaşayır. Amma mən azərbaycanlıyam.

- Dünya və Avropa çempionatlarından medallarınız var, amma qızıl medal üçün elə bil nə isə çatışmır...

- Yeniyetmələr arasında Avropa və dünya çempionu, gənclər arasında Avropa çempionu olmuşam. Böyüklərə gəldikdə, müəyyən turnirlərin qalibi adını qazanmışam. Dünya çempionatında iki dəfə üçüncü olmuşam. Qatıldığım ikinci mundialın yarımfinalında qarşıma kubalı Fernando Arzola çıxdı, hakimlər məni sıxdılar, finala çıxmağa qoymadılar. Halbuki qızıl medal uğrunda döyüşə vəsiqə qazanmaq haqqım idi. Finala çıxsaydım, nəticəni bilmək olmazdı. Minsk-2023 II Avropa Oyunlarının finalında böyük britaniyalı Delişes Oriyə uduzaraq ikinci oldum. Bu da onunla əlaqədar idi ki, daha əvvəl dünya çempionatında çoxlu döyüş keçirmişdim. Oyunlar zamanı da ağır qarşılaşmalarım olduğundan, bədənim yorulmuşdu. Orada çempion da ola bilərdim, sadəcə, yükləndim. Məsələn, rəqibim dünya çempionatında da finalında vuruşmuşdu və daha sonra birbaşa Avropa Oyunlarına hazırlaşmışdı, rəqibləri də elə də güclü deyildi. Məndə isə güclü rəqiblər idi deyə artıq finalda bədənim tab gətirmədi. Gələcəkdə bunların hamısını "qızıl"a çevirmək istəyirəm.

- Elə bil bəzən bəxtiniz də gətirmir. Tokio-2020-də 1/8 finalda özbəkistanlı boksçu Bahodir Jalolova uduzmuşdunuz. Yekunda isə Jalolov olimpiya çempionu oldu. Sonradan onunla döyüşünüz oldu?

- Xeyr, sonradan yalnız təlim-məşq toplanışlarında görüşmüşük, rinqdə isə üz-üzə gəlməmişik.

- Bəs Paris-2024-də nə baş verdi?

- Əvvəllər udduğum almaniyalı Nelvi Tiafaka Fransa paytaxtında 1/8 finalda məğlub oldum. Polşada keçirilmiş 2023-cü il III Avropa Oyunlarının yarımfinalında Tiafakı üstələyək, olimpiadaya lisenziya qazanmışdım. Paris-2024-dən iki həftə əvvəl isə onunla sınaqçı rəqib kimi işləmişdim, rahat döyüşə bilirdim. Amma başa düşə bilmədim ki, olimpiadada nə oldu. Bilmirəm, olimpiadada nə isə oldu, getmədi. Sanki Paris-2024 mənə düşmədi.

- Hazırda heyətdə nəsildəyişmə prosesi getdiyi üçün sizə bütün böyük yarışlarda əsas medal ümidi kimi yanaşırlar. Bu fikirlə razınız?

- Bəli, mənə əsas medal ümidi kimi yanaşılır. Amma heyətdə ciddi dəyişiklik olmayıb. Cavanlar da gəlib, yaxşı uşaqlardırlar, yenə də gəlməkdədirlər. Məndən də yaxşısı gələcək, hər şey mümkündür.

- Dünyada yeni boks təşkilatının yaranması barədə nə deyə bilərsiniz? Los-Anceles-2028 Yay Olimpiya Oyunlarında da boks yarışlarını Dünya Boksu təşkilatı keçirəcək. Bu parçalanmanın boksçulara təsiri varmı?

- Psixoloji olaraq heç bir problem yaratmır. Rinqdir, lazım gəlsə, hər iki təşkilatın yarışlarında vuruşacağıq. Problemlər hakimlərə görə ola bilər. Eləsi var təzədir deyə, tanımırıq.

- Ən azından bu təşkilatı digərindən daha ciddi qəbul edirlər?

- Yeni yaradılsa da, olimpiadaya vəsiqəni bu təşkilat verir. Bir az söz-söhbətlər oldu, IBA-nın (Beynəlxalq Boks Assoisiasiyası - red.) prezidenti Rusiyayadan olan Umar Kremlyovdur. Ona görə belə alındı. Çox da qarışmıram, bizim işimiz döyüşməkdir.

- Yaratdıqları şərait baxımından Azərbaycan Boks Federasiyasının indiki rəhbərliyi ilə əvvəlkini necə müqayisə edərdiniz?

- Hazırda şərait daha yaxşıdır. Bizim məşqlərimiz, maliyyəmiz hər şey qaydasındadır. Hər şey daha düzgün, qrafikə uyğun gedir. Xaricdə də, ölkə daxilində də təlim-məşq toplanışlarımız olur. Daimi hazırlıq proseslərindəyik. Qidalanmamıza qədər hər şey yaxşıdır, vaxtlı-vaxtındadır.

İdman.biz