Idman.biz
Braziliyanın Rio-de-Janeyro şəhərində keçirilən UFC Fight Night 261 turnirində gecənin əsas döyüşü baş tutub.
İdman.biz xəbər verir ki, qarşılaşmada yüngül çəki dərəcəsində (70 kq) keçmiş çempion Çarlz Oliveyra (Braziliya) ilə polyak döyüşçü Mateuş Qamrot üz-üzə gəlib.
Döyüş ikinci raundda Oliveyranın boğucu fəndlə erkən qələbəsi ilə yekunlaşıb.
Beləliklə, 35 yaşlı braziliyalının peşəkar MMA karyerasındakı nəticəsi 36 qələbə, 11 məğlubiyyət təşkil edir. 34 yaşlı Qamrot isə 25 qələbə və 4 məğlubiyyət göstəricisinə malikdir.
Xatırladaq ki, Oliveyra son döyüşündə – iyulda UFC 317 turnirində gürcü İliya Topuriyaya nokautla uduzmuşdu. Qamrot isə may ayında UFC on ESPN 68 turnirində slovak Lyudovit Kleyni hakimlərin yekdil qərarı ilə məğlub etmişdi.
