Idman.biz
Səudiyyə Ərəbistanının paytaxtı Ər-Riyadda keçirilən VI İslam Həmrəyliyi Oyunlarında boks yarışlarının yarımfinal mərhələsi yekunlaşıb.
İdman.Biz xəbər verir ki, Azərbaycan millisinin üç boksçusu finala yüksəlib.
60 kq çəki dərəcəsində çıxış edən Məhəmmədəli Qasımzadə yerli idmançı Tamer Almatrfini ilk raundda vaxtından əvvəl məğlub edərək finala vəsiqə qazanıb. Təmsilçimiz qızıl medal uğrunda Özbəkistan boksçusu Madiyar Daniyarovla qarşılaşacaq.
80 kq çəkidə Səidcəmşid Cəfərov yarımfinalda İordaniya idmançısı Husseyn İaşaişi 5:0 hesabı ilə üstələyib. Cəfərov finalda Türkiyə təmsilçisi Sultan Osmanlı ilə döyüşəcək.
57 kq çəki dərəcəsində çıxış edən Aynur Mikayılova isə Fələstin boksçusu Nura Abunabı 5:0 hesabı ilə məğlub edərək finala yüksəlib. Onun həlledici görüşdə rəqibi Xumorabonu Mamajonova (Özbəkistan) olacaq.
Xatırladaq ki, turnirdə digər boksçularımızdan Fatimə Mehdiyeva (65 kq) və Sərxan Əliyev (70 kq) yarışı bürünc medalla başa vurublar.
Qeyd edək ki, sabah keçiriləcək final mərhələsində Nərgiz Zeynalova (54 kq) da rinqə çıxacaq. Onun rəqibi Ayşen Taşkın (Türkiyə) olacaq.
