Idman.biz
Ağır çəkidə hazırkı UFC çempionu 32 yaşlı ingilis Tom Aspinall ilə 35 yaşlı fransız Siril Qan arasında BƏƏ-nin Əbu-Dabi şəhərində keçirilən UFC 321 çərçivəsindəki döyüş baş tutmamış hesab edilib.
İdman.Biz-in məlumatına görə, buna döyüşün ilk raundunun sonunda Qanın barmağının Aspinallın gözünə girməsi səbəb olub.
"MMA Mania"nın jurnalisti Aleks Bequnin sosial media səhifəsində Aspinallın hospitala yerləşdirildiyi barədə məlumat verib.
Döyüşün baş tutmaması səbəbindən Aspinall UFC çempionluq titulunu qoruyub saxlayır.
Tom 32 yaşındadır. Aspinall peşəkar qarışıq döyüş sənətlərində debütünü 2014-cü ilin dekabrında edib və 2020-ci ildə dünyanın ən güclü promouterinə qoşulub. Onun hesabında 15 qələbə və üç məğlubiyyət var.
Siril 35 yaşındadır. Fransız döyüşçü peşəkar MMA-da debütünü 2018-ci ilin avqustunda edib. Qan 2019-cu ilin avqustunda Şimali Amerika Liqasına keçib. Onun 13 qələbəsi və iki məğlubiyyəti var.
