Idman.biz
Bəyanatları amerikalı şahmatçı Daniel Naroditskinin ölümünə səbəb olduğu iddia edilən rusiyalı qrossmeyster, şahmat üzrə 14-cü dünya çempionu Vladimir Kramnikə qarşı başladılan petisiyanı 15 mindən çox adam imzalayıb.
İdman.Biz xəbər verir ki, onlar Kramnikin diskvalifikasiyasını və bütün titullarından məhrum olunmasını tələb edirlər.
Petisiya change.org platformasında yerləşdirilib.
Bildirilir ki, Kramnikin davranışı Beynəlxalq Şahmat Federasiyasının (FIDE) etik normalarını pozur. Sənədi imzalayanlar beynəlxalq təşkilatdan rusiyalı qrossmeysterə qarşı qəti tədbirlər görülməsini tələb edirlər.
Naroditskinin onlayn-yayımlarını izləyən Kramnik, oktyabrın 19-da həyəcan təbili çalaraq bildirib ki, amerikalı şahmatçı, ola bilsin, yuxu dərmanından daha güclü vasitədən istifadə edib. O, Naroditskinin ətrafındakı insanlara müraciət edərək, onları bu şahmatçıya yardım etməyə çağırıb. Kramnik daha əvvəl Danielin şahmat fırıldaqlarında əlinin olması ilə bağlı şübhələr də yaradıb.
Naroditskinin ölümü haqqında xəbərlər yayılanda bəzi internet istifadəçiləri Kramniki ona psixoloji təzyiq göstərməkdə ittiham ediblər. Onların fikrincə, şahmatçının faciəli ölümünə məhz bu təzyiq səbəb ola bilərdi.
16-cı dünya çempionu, norveçli qrossmeyster Maqnus Karlsen də Kramnikin Naroditskini amansızcasına təqib etdiyini bildirib. "Kramnikin Naroditskiyə qarşı hərəkətləri dəhşətli idi və nəticələri də göz qabağında idi. Bütün bunlar Naroditskini çoxdan son dərəcə ağır vəziyyətə salmışdı" – Karlsen deyib.
Vladimir Kramnik özü 29 yaşlı amerikalı şahmatçı Daniel Naroditskinin ölümündən sonra sosial şəbəkələrdə ona ünvanlanan çoxsaylı hədələrlə bağlı məhkəməyə müraciət etmək niyyətində olduğunu açıqlayıb.
Qeyd edək ki, Naroditskinin ölüm xəbəri oktyabrın 20-də yayılıb. Şahmatçı noyabrın 9-da 30 yaşını qeyd edəcəkdi.
Naroditski FIDE dünya reytinqində 151-ci, ABŞ şahmatçıları arasında isə 17-ci yeri tuturdu. O, həmçinin 12 yaşadək idmançılar arasında dünya çempionu olub, ABŞ çempionatlarında iştirak edib, şahmat haqqında kitablar yazıb. 2025-ci ilin sentyabrında keçirdiyi "Charlotte Open" adlı son turnirində mümkün 8 xaldan 5.5 xal toplayaraq 3-4-cü yerləri bölüşüb.
