Idman.biz
Batumidə keçirilən Dünya kubokunda azərbaycanlı qadın şahmatçıların çıxışı çox qısamüddətli olub. Onlar yüksək reytinqə malik rəqiblərin müqavimətini qıra bilməyərək, artıq ikinci mərhələdə turnirlə vidalaşıblar. Komanda turnirlərində şahmatçılarımız uğurlu çıxış etsələr də, son vaxtlar fərdi yarışlarda eyni uğuru göstərmək mümkün olmur.
İdman.biz xəbər verir ki, Dünya kuboku ənənəvi olaraq güclü iştirakçı heyəti ilə seçilir və iştirakçıları bir aylıq yarış rejimi gözləyir.
Əlbəttə, bu, əsasən yarımfinala qədər irəliləyəcək şahmatçılara aiddir. Batumidə mükafatlar da kifayət qədər ciddidir – ilk üç yerin sahibləri İddiaçılar Turnirində iştirak hüququ qazanacaqlar.
Belə bir şans azərbaycanlı şahmatçılar üçün hələ də mövcuddur – bunun üçün sentyabrda Səmərqənddə keçiriləcək "Grand Swiss" turnirində uğurlu çıxış etmək lazımdır. Bu yarışda Gövhər Beydullayeva, Ülviyyə Fətəliyeva və Xanım Balacayeva iştirak edəcəklər. Amma bu, hələ qabaqdadır. Fakt isə budur ki, Dünya kuboku şahmatçılarımız üçün məyusedici alındı.
Gülnar Məmmədova birinci mərhələdə Kanada təmsilçisi Yunşan Li ilə klassik partiyalarda iki heç-heçədən sonra tay-breykdə qalib gəldi. Amma 1/32 finalda o, Rusiya şahmatçısı Polina Şuvalovaya hər iki partiyada uduzdu.
Ülviyyə Fətəliyeva da ikinci mərhələyə vəsiqə qazandı. Turnirin startı onun üçün kifayət qədər uğurlu oldu – o, ilk partiyada Avstraliyadan olan Janq Jilini məğlub etdi, ikinci oyunda isə heç-heçə qeydə alındı. Lakin növbəti mərhələdə onun rəqibi gürcü şahmatçısı Lela Cavaxişvili oldu. Cavaxişvili ilk partiyada üstünlük qazandı, ikinci oyunda isə Fətəliyeva yalnız heç-heçə edə bildi ki, bu da onun turnirlə vidalaşması demək idi.
Turnir Gövhər Beydullayeva üçün isə dramatik keçdi. İran şahmatçısı Anahita Zahedifarla klassik partiyalarda iki heç-heçədən sonra tay-brekdə Gövhər iki dəfə önə keçdi. Amma hər iki halda iranlı şahmatçı hesabı bərabərləşdirdi və nəticədə şahmatçımız üstünlüyünü qoruya bilməyərək 2,5:3,5 hesabı ilə məğlub oldu.
Ən uğursuz çıxış isə Xanım Balacayevaya məxsus oldu. O, birinci mərhələnin ilk oyununda Qazaxıstan təmsilçisi Elnaz Kaliaxmetə uduzdu. Cavab qarşılaşması isə heç-heçə nəticələndi.
Bir sözlə, Azərbaycanın qadın şahmatçılardan heç biri 1/32 final mərhələsini keçə bilmədi. Dünya kuboku artıq onlarsız davam edir.
Zəki Feyzullayev
İdman.biz
