U-17 sərbəst güləş üzrə Avropa çempionatında qələbə: Böyük məşqçi qələbələri şəhidlərin ruhuna həsr etdi

Qələbələrimizi şəhidlərimizi ruhuna həsr edirik. Bizim hər qələbəmiz şəhidlərimizə həsr olunur.

"Report" xəbər verir ki, bunu Şimali Makedoniyanın paytaxtı Skopyedəki U-17 Avropa çempionatında qələbə qazanan sərbəst güləş üzrə milli komandanın böyük məşqçisi Əsgərxan Novruzov jurnalistlərə açıqlamasında deyib.

"Ermənistan komandası 48 kq çəki dərəcəsində çox güclü idi. Bu komanda ilə 6 görüş keçirdik, onların beşində qələbə qazandıq", - böyük məşqçi bildirib.

Ə.Novruzov keçən il olduğu kimi bu il də çempion olduqlarını xatırladıb:

"Keçən il olduğu kimi məqsədimiz çempion olmaq idi. Bilirsiniz ki, komanda Avropa çempionu olmuşdu. İstəyirdik ki, ardıcıllıq davam etsin. İlk dəfə 2022-ci ildə komanda çempion oldu, 2023-cü ildə isə bir xal qaçırdıq. Bu il vəziyyət çətin idi. Ukrayna komandası ilə son ana qədər mübarizə apardıq. Xaçmaz Olimpiya İdman Kompleksində təlim-məşq toplantısı keçmişdik. Federasiyaya, Milli Olimpiya İdman Komitəsinə, Gənclər və İdman Nazirliyinə bu şəraiti yaratdığı üçün təşəkkür edirik".

Qeyd edək ki, Azərbaycanın yeniyetmələrdən ibarət sərbəst güləş millisi Avropa çempionu olub. Azərbaycan yığması qitə birinciliyində uğurlu cıxış edərək 6 medal qazanıb. Məsul yarışda 3 qızıl, 1 gümüş və 2 bürünc medal əldə edilib. Bu nəticə ilə 151 xal toplayan millimiz növbəti dəfə Avropa çempionu olub. Ukrayna 144 xalla ikinci, Gürcüstan isə 116 xalla üçüncü yeri tutub.

Xatırladaq ki, böyük məşqçi Əsgərxan Novruzov, məşqçilər Vahid Məmmədovla Yaşar Əliyevin rəhbərliyi altında Rəvan Həsənzadə (48 kq), Ruslan Əlizadə (55 kq) və Səid Paşayev (92 kq) qızıl, Həsən Həsənov (60 kq) gümüş, Ramal Mirhüseynov (51 kq) və Hakim Tağıyev (110 kq) isə bürünc medal qazanıb.