U-17 Dünya Çempionatı: Sərbəst Güləşçilərimizdən İkisi Yarımfinalda

Yunanıstanın paytaxtı Afinada 17 yaşadək güləşçilər arasında dünya çempionatı davam edir.

İdman.biz xəbər verir ki, mundialın beşinci günündə sərbəst güləşçilər mübarizəyə start veriblər.

Xalçaya çıxan pəhləvanlarımızdan ikisi yarımfinala vəsiqə qazanıb.

U-17 dünya çempionatı
Sərbəst güləş
4️8️ kq
Rəvan Həsənzadə belaruslu Makar Markoviçə (UWW) tam üstünlüklə (12:0), özbəkistanlı Cahangir Tulkunova 4:2 hesabıyla qalib gələrək yarımfinala yüksəlib. Rəvan yarımfinalda amerikalı Ariah Millslə güləşəcək.

5️5️ kq
Ruslan Əlizadə moldovalı Dan Bulqaruya və kanadalı Aaharen Piranavana 10:0 hesabıyla qalib gəldikdən sonra 1/4 finalda rusiyalı Çingis Sarıqlara (UWW) 8:9 hesabıyla məğlub olub.

6️5️ kq
Hüseyn İsmayılov kanadalı Liam Qortonı 4:2, yunanıstanlı Konstantinos Mixailidisi tam üstünlüklə (11:0), qırğızıstanlı Adisbek Altınbekovu 2:1 hesabıyla məğlub edib. Güləşçimiz yarımfinalda qazaxıstanlı Yerali Askerbeklə üz-üzə gələcək.

8️0️ kq
Nihad Süleymanlı debütdə ermənistanlı Vaçe Aslanyana 7:1 hesabıyla qalib gəlib. Ancaq 1/8 finalda sona 3 saniyə qalmış qələbəni əldən verən Nihad rusiyalı İssa Zanqiyevə (UWW) 5:7 hesabıyla uduzub.

1️1️0️ kq
Hakim Tağıyev belaruslu Mikita Tkaçikə (UWW) tam üstünlüklə (10:0), amerikalı Aleksander Teylora isə 7:6 hesabıyla qalib gəlib. Güləşçimiz 1/4 finalda rusiyalı Avropa çempionu Maqomedrasul Omarova (UWW) 0:5 hesabıyla məğlub olub.

Yarımfinallar Bakı vaxtı ilə 18:00-da başlayacaq.

Qeyd edək ki, dünya çempionatına avqustun 3-də yekun vurulacaq.

İdman.biz