Idman.biz
Azərbaycanın yunan-Roma güləşi üzrə yeniyetmələrdən ibarət yığmasının baş məşqçisi Taleh İsrafilov MDB Oyunlarında komandasının çıxışını dəyərləndirib.
III MDB Oyunlarında yunan-Roma güləşi yarışları başa çatıb. Azərbaycan təmsilçiləri turniri parlaq nəticə ilə bitiriblər - komandamız 3 qızıl, 2 gümüş və 1 bürünc medal qazanıb.
Mükafatlandırma mərasimindən dərhal sonra İdman.biz Gəncədə komandamızın baş məşqçisi Taleh İsrafilovla söhbətləşib.
– Komandanın çıxışını necə dəyərləndirirsiniz? Əvvəlcədən neçə qızıl medal planlaşdırılmışdı?
– Düzünü desəm, biz dörd qızıl medal planlaşdırmışdıq. Təəssüf ki, bəzi favoritlərimizdə problemlər yarandı. Məsələn, Səid Paşayev (92 kq) çəki problemi ilə üzləşdi, Riad İbrahimov (110 kq) isə gözlənilmədən zədələndi. Şükür ki, digər güləşçilər bizi sevindirdilər. Buna görə narazı deyiləm, amma açığı, beş qızıl da ola bilərdi.
– Sərbəst güləşçilər yenə də qızıl medalların sayında geridə qaldı. Bunun səbəbi nədir?
– Dəqiq səbəb demək çətindir. Sərbəst güləşdə məşqçilər bizdən zəif işləyir demək düzgün olmaz — onlar da çox yaxşı iş görürlər. Sadəcə, bu idmandır: bu gün biz çox medal qazanırıq, sabah onlar. Üstəlik, biz yeniyetmələrlə işləyirik — hələ psixoloji baxımdan tam formalaşmamış gənclərlə. Onlar hər kəsi də dinləmirlər. Kiminsə motivasiyası az olur, kiminsə ətrafında problemlər yaranır, bəzən isə sadəcə həmin çəki dərəcəsində rəqabət fərqli olur.
– Komandada sözə baxmayan idmançılar olurmu? Məsələn, çempionlar?
– Elə onlar çempion oldular, çünki məşqçilərin dediklərini dinlədilər və tapşırıqları yerinə yetirdilər (gülür).
– Bəs medal şansını qaçıranlar?
– Aralarında bəxti gətirməyənlər də var idi. Məsələn, Emil Abbasov öz çəki dərəcəsində (80 kq) yox, 92 kiloqramda çıxış etdi və orada Səid Paşayevi əvəzlədi. Nəticədə, o, özündən 5-6 kiloqram ağır rəqiblərlə güləşməli oldu.
Nihad Tağıyev isə çox istedadlı olsa da, hər zaman tapşırıqları yerinə yetirmirdi və nəticədə mükafatçılar sırasına düşə bilmədi.
– Sizcə, bu günün çempionlarından kimlər gələcəkdə böyüklər arasında da uğur qazana bilər?
– Mən inanıram ki, Əli Nəzərov buna qadirdir - onun güləş üslubu çox yüksək səviyyədədir. Həmçinin İslam Sultanov da əsl güləş xarakterinə malikdir. Amma İslamın gələcək uğurları 50/50-dir. Bəli, istedadlıdır, amma hələ üzərində çox işləməlidir.
– Son olaraq, yeniyetmələr arasında çəki salmaq asandır, yoxsa çəki yığmaq?
– Mən məşqçi kimi yeniyetmələrdə çəki salmağın əleyhinəyəm. Onlar hələ böyümə dövründədirlər və orqanizmlərinə bu cür yüklənmə çox zərərlidir. Bu, təkcə sağlamlığa deyil, psixologiyaya da mənfi təsir göstərə bilər. Bəli, böyüklər arasında 10 faizədək çəki salmaq mümkündür, amma bu yaşda belə yanaşma doğru deyil. Yeniyetmələr üçün çəki yığmaq daha təbii və təhlükəsizdir.
Vüqar Vüqarlı
