Idman.biz
Dünya güləşinin canlı əfsanəsi, qadın güləşi üzrə beş dəfə Olimpiya oyunlarının iştirakçısı (onlardan dördündə fəxri kürsüyə qalxıb – red.), Azərbaycan millisinin sabiq üzvü Mariya Stadnik İdman.Biz-ə müsahibə verib.
- Mariya, hazırda nə ilə məşğulsunuz?
- Ofisdəyəm (gülür). Karyeramı bitirdikdən sonra, bu ilin fevralından qadın güləşi üzrə yığmanın koordinatoruyam. Komandaya, bütün yaş qruplarına rəhbərlik edirəm, qadın güləşi ilə bağlı problemləri analiz edir və istedadlı idmançılar axtarıram.
- Son doqquz ayda yeni istedadlar tapa bilmisinizmi?
- Doqquz ay ərzində hamilə qalmaq olar, mən isə qadın güləşi ilə "hamilə qalmışam", amma hələ doğmamışam (gülür). Mənə istedadı kəşf edib yetişdirmək, böyük qələbələrə hazırlamaq üçün beş-altı il lazımdır.
- Yaxın beş-altı ildən sonra hamının tanıdığı və rəğbət bəslədiyi yetirmələriniz olacaq?
- Öz yetirmələrim yoxdur, bu baxımdan neytralam. Mənim məqsədim komandadakı hər bir qızın nəticə göstərməsi, hər kəsin haqqında danışılması və hər birindən müsbət nəticə gözlənilməsidir. Hazırda çox istedadlı qızlar var və onlara inanıram, amma hər şeyi zaman göstərəcək.
- Mənfi hadisələr sizi necə bu qədər pozitiv saxlaya bilir?
- Əsas olan içimizdədir, ətrafda deyil. İnsan içində nə qədər inam və sevgi varsa, xarici təsirlər bir o qədər az təsir edir.
- Özünüzü əfsanə kimi hiss edirsinizmi? Beş Olimpiya oyunu, dördündə fəxri kürsüyə qalxmaq, saysız-hesabsız titullar…
- Xeyr, özümü nə canlı, nə də başqa bir formada əfsanə hiss etmirəm (gülür). Sadəcə, mənim bacardığım işi hələ heç kim bacarmayıb.
- Sizin uğurunuzu kimsə təkrarlaya bilərmi?
- Düşünürəm ki, təkrarlaya bilərlər. Mən axı bacarmışam! Onlar da bunu anlayırlar. Hər şeyin mümkün olduğunu görürlər. Əsas odur ki, bunu əldə etmək və reallaşdırmaq istəsinlər.
- Karyeranızın üç ən xoşbəxt anı hansılardır?
- Güləşə başladığım və güləşi bitirdiyim anlar (gülür). Amma ciddi desək, böyük qələbələrlə bağlı hər an mənim üçün xoşbəxt olub.
- Böyük uğursuzluqlar yaşadınız? Onların içində hələ də sizi narahat edən varmı?
- Yox, belə şeylər yoxdur. Əvvəllər uğursuzluq olduğunu düşünürdüm, amma indi başa düşürəm ki, istədiyim kimi alınmayan hər şey sadəcə mənim təcrübəmdir.
- Üç ən dəyərli arzunuzu deyə bilərsiniz?
- Birincisi - Vətənim, Ukraynada müharibənin sona çatması. İkincisi - uşaqlarımın sağlam olması. Üçüncüsü - insanların sülhü qiymətləndirməsi və hörmət etməsi, bir-birini sevməsi.
Vüqar Vüqarlı
