Sport24.az
"İranlı güləşçi əvvəlcə İrəvana gedib, sonra isə Bakıya yollanıb". Sport24.az xəbər verir bu barədə Ermənistanın "SPORTBALL24" portalı məlumat yayıb:
"Planetin ən perspektivli güləşçilərindən biri Əmirreza Məsumi Bakıda məşqdən birində görüntülənib. Məsumi sosial şəbəkə hesabında əvvəlcə İrəvandan, sonra isə Bakıdan fotolar yerləşdirib. Bundan başqa, internetdə iranlının Azərbaycan millisinin düşərgəsindəki məşqinin fotosu yayılıb. Bu, asiyalı dünya çempionu ilə Azərbaycan Güləş Federasiyası arasında danışıqların müsbət yekunlaşdığını göstərir.
Bundan əvvəl İran Güləş Federasiyasının rəhbəri Məsumini tənqid edib və onu milli komandanın heytindən uzaqlaşdırıb. Güləşçinin əvvəlcə Ermənistan Federasiyası ilə əlaqə saxlamasına baxmayaraq, Azərbaycanın Məsuminin yeni idman vətəninə çevrilməsi tamamilə mümkündür".
Qeyd edək ki, Əmirreza Məsuminin U17, U20 və U23 yaş kateqoriyalarında dünya çempionatında altı medalı var. O, həmçinin 2025-ci ilin Asiya Çempionu və Zaqrebdə keçirilən reytinq turnirinin qalibidir (2025).
