Güləş üzrə Dünya Çempionatı: Əzizlidən bürünc, Qənizadə finalda, Əhmədiyev bürünc uğrunda mübarizə aparacaq

Xorvatiyanın paytaxtı Zaqrebdə keçirilən güləş üzrə dünya çempionatında Azərbaycan yunan-Roma güləşçisi Eldəniz Əzizli (55 kq) bürünc medal qazanıb.

İdman.biz-in məlumatına görə, Əzizli üçüncü yer uğrunda görüşdə Ulan Muradbek Uulunu 9:0 hesabı ilə məğlub edib.

20:02

Azərbaycan yunan-Roma güləşçisi Ülvi Qənizadə (72 kq) Xorvatiyanın Zaqreb şəhərində keçirilən dünya çempionatında finala yüksəlib.

İdman.biz-in məlumatına görə, Qənizadə yarımfinalda özbəkistanlı Abdulla Əliyevi 5:0 hesabı ilə məğlub edib. Onun finaldakı rəqibi daha sonra müəyyənləşəcək.

Bu arada yunan-Roma güləşçisi Murad Əhmədiyev (97 kq) Zaqrebdə keçirilən dünya çempionatında finala yüksələ bilməyib. O, yarımfinal görüşündə rusiyalı Artur Sarkisyana (UWW) son xal qaydası ilə uduzub (1:1).

Beləliklə, Əhmədiyev dünya çempionatında bürünc medal uğrunda mübarizəni davam etdirəcək.

Üçüncü yer uğrunda həlledici görüşlər sabah baş tutacaq.

18:55

Xorvatiyanın paytaxtı Zaqrebdə keçirilən dünya çempionatında Azərbaycanın iki yunan-Roma güləşçisini yarımfinal döyüşləri gözləyir.

İdman.biz-in məlumatına görə, Ülvi Qənizadə (72 kq) və Murad Əhmədiyev (97 kq) dünya çempionatının yarımfinalına yüksəlib.

Yarımfinalda Qənizadə özbəkistanlı Abdulla Əliyevlə, Əhmədiyev isə rusiyalı Artur Sarkisyanla qarşılaşacaq.

Bu arada Nihad Məmmədli (60 kq) 1/4 finalda Əlişir Qəniyevə (Özbəkistan, 4-8) məğlub olub. Özbəkistanlı güləşçi finala yüksəlsə, Məmmədli bürünc medal uğrunda mübarizə aparmaq imkanı qazanacaq.

12:29

Xorvatiyanın paytaxtı Zaqrebdə keçirilən dünya çempionatında bu gün üç Azərbaycan güləşçisi mübarizə aparacaq.

İdman.biz-in məlumatına görə, yeddinci yarış günündə mübarizə aparacaq yunan-Roma güləşçilərimizdən Nihat Məmmədli (60 kq) və Ülvi Qənizadənin (72 kq) rəqibləri seçmə mərhələdən sonra müəyyənləşəcək.

Murad Əhmədiyev (97 kq) italiyalı Nikoloz Kaxelaşvili ilə qarşılaşacaq.

Dünən yarımfinalda uduzan Eldəniz Əzizli (55 kq) bu gün bürünc medal uğrunda mübarizə aparacaq. O, Ulan Muratbek Uulu (Qırğızıstan) və Artem Deleanu (Moldova) arasındakı döyüşün qalibi ilə qarşılaşacaq.

Komandanın hazırda dörd medalı var. Giorgi Meşvildişvili (125 kq) gümüş, Nurəddin Novruzov (61 kq), Arseni Djioyev (86 kq) və Osman Nurməhəmmədov (92 kq) bürünc medal qazanıb.

İdman.biz