Idman.biz
Sərbəst güləş üzrə Azərbaycan idmançıları Nurəddin Novruzov (61 kq) və Arseniy Cioyev (86 kq) Xorvatiyanın paytaxtı Zaqrebdə keçirilən dünya çempionatında bürünc medal uğrunda güləşəcəklər.
İdman.biz xəbər verir ki, hər iki pəhləvan təsəlliverici görüşlərdə qalib gələrək medal şansını qoruyub.
Novruzov əvvəlcə ekvadorlu Coşua Krameri (rəqib zədələndiyi üçün) üstələyib, daha sonra isə ukraynalı Kamil Kerimovu 12:2 hesabı ilə məğlub edib. O, bürünc üçün görüşdə koreyalı Kum Hyuk Kimlə üz-üzə gələcək.
Cioyev isə digər təsəlliverici görüşdə ukraynalı Maqomed Əliyevi 7:2 hesabı ilə məğlub edib. Bürünc medal qarşılaşmasında onun rəqibi Fransanı təmsil edən Rahim Maqomedov olacaq.
Bürünc medal görüşləri və final qarşılaşması bu gün axşam saatlarında keçiriləcək. Finalda güləşçimiz Georgi Meşvidjişvili (125 kq) ilə Amir Hüseyn Zarenin (İran) dueli bu axşam baş tutacaq.
****
10:27
Bu gün Xorvatiyanın paytaxtı Zaqrebdə keçirilən güləş üzrə dünya çempionatında ilk medal dəstləri sahibini tapacaq.
İdman.biz xəbər verir ki, Azərbaycan millisinin üç güləşçisi medal uğrunda mübarizə aparacaq.
Ağır çəkidə (125 kq) Olimpiya-2024-ün bürünc medalçısı Giorgi Meşvildişvili dünya çempionu adını qazanmaq üçün final görüşünə çıxacaq. Onun rəqibi iranlı güləşçi, Tokio-2020-nin bürünc, Paris-2024-ün isə gümüş medalçısı Amir Hüseyn Zare olacaq.
Qeyd edək ki, Meşvildişvili ilk dəfə dünya çempionatında medal qazanacaq. O, bundan əvvəl Avropa çempionatlarında 3 dəfə fəxri kürsüyə qalxıb – 2023 və 2024-cü illərdə bürünc, 2025-ci ildə isə qızıl medal əldə edib.
İki idmançımız – Nurəddin Novruzov (61 kq) və Arseniy Cioyev (86 kq) bürünc medal üçün mübarizə aparacaqlar. Novruzov təsəlliverici mərhələdə ilk görüşünü Ekvador təmsilçisi Coşua Kramerə qarşı keçirəcək. Cioyevin rəqibi isə daha sonra müəyyənləşəcək.
İdman.biz
