Idman.biz
Azərbaycanın tanınmış oxatanı Yaylagül Ramazanova təkcə idmanda deyil, həm də həyat hekayəsi ilə bir çoxlarının qəlbini fəth edib. O, 2024-cü il Paris Yay Olimpiya Oyunlarında yeddi aylıq hamilə olmasına baxmayaraq yarışda iştirak etməklə həm Azərbaycanda, həm də dünyada qadınlar üçün güc və iradə simvoluna çevrildi. Bu hadisə ölkəmizdə oxatma idmanına marağın artmasına da təkan verdi.
Yaxın günlərdə Yaylagül Ramazanova III MDB Oyunlarında artıq fərqli statusda - hakim kimi çıxış edib. Yarış zamanı o, ilk dəfə olaraq bir yaşlı qızı Alifa ilə birlikdə ictimaiyyət qarşısına çıxıb. Beləcə, kiçik Alifa da, fərqinə varmadan, anasının idman yolunun bir hissəsinə çevrilib.
İdman.Biz Yaylagül Ramazanova ilə analıq, III MDB Oyunları və Azərbaycanda oxatmanın inkişafı mövzusunda söhbətləşib.
- III MDB Oyunlarında ilk dəfə qızınızla birlikdə ictimaiyyət qarşısına çıxdınız. Bu, sizin üçün nə demək idi?
- Bu, mənim üçün çox duyğulu və unudulmaz an idi. Üstəlik, həmin gün onun birinci ad günü idi. Bu gözəl günü Xankəndidə qeyd etmək məni çox xoşbəxt etdi.
- Qızınızı tez-tez özünüzlə işə, məşqlərə aparırsınızmı?
- O, hələ balacadır, ona görə də demək olar ki, hər zaman yanımdadır. Onunla çox vaxt keçirirəm. Analıq böyük məsuliyyətdir, buna görə də övladı başqasına etibar etmək asan deyil. Amma bəzən elə olur ki, peşəkar öhdəliklər buna imkan vermir. Belə hallarda onu yalnız güvəndiyim insanlara həvalə edirəm.
- Bu dəfə III MDB Oyunlarında idmançı kimi deyil, hakim kimi iştirak etdiniz. Bu istiqamətdə davam etməyi düşünürsünüzmü?
- Bəli, bu təcrübə mənim üçün çox dəyərli oldu. İdmançı kimi yarışmaq gözəl hissdir, hakim kimi bütün prosesi idarə etmək isə insana tam başqa baxış bucağı qazandırır. Bu istiqamətdə inkişafı davam etdirmək istərdim, amma eyni zamanda ölkəmizi idmançı kimi də təmsil etmək niyyətindəyəm.
- Yarışların Xankəndidə keçirilməsinin sizcə, nə kimi əhəmiyyəti var?
- Bu, Azərbaycan idmanı üçün böyük mənəvi önəm daşıyır. Mən əminəm ki, azad edilmiş ərazilərdə idmanın inkişafı sürətlə gedəcək. Orada artıq müasir infrastruktur, gənc istedadlar və böyük potensial var.
- III MDB Oyunlarında oxatanlarımız medal qazana bilmədi. Bunun səbəbini nədə görürsünüz?
- Bəzən nəticə gözləntiləri doğrultmur, bu da idmanın bir hissəsidir. Komandamız çox çalışdı, amma psixoloji gərginlik təsirini göstərdi. Belə yarışlarda məsuliyyət və stress çox olur. Əsas məsələ davamlı məşq və sabitlikdir. Bizim idmançılarımızda potensial var, sadəcə, nəticələrin oturuşması üçün zaman və düzgün planlama lazımdır.
- Qadın oxatanların fəaliyyətini necə qiymətləndirirsiniz?
- Son illərdə Azərbaycanda bu sahə xeyli irəliləyib. İnsanların, xüsusilə qızların bu idmana marağı artıb. Artıq iddialı və istedadlı qadın oxatanlarımız yetişir və yaxın illərdə onların yüksək nəticələr göstərəcəyinə inanıram.
- Qızınızın da gələcəkdə oxatmaya marağı ola bilərmi?
- O, hansı sahəni seçsə, biz yalnız dəstək olacağıq. İdman həyat məktəbidir - insanı formalaşdırır. Əlbəttə, mən sevinərdim ki, mənim yolumla getsin, amma onun seçim azadlığına hörmətlə yanaşacağam. Əsas odur ki, sağlam, inamlı və xoşbəxt böyüsün.
Bu gönderiyi Instagram'da gör
- Ana olduqdan sonra məşqlərə qayıtmaq çətin oldumu?
- Doğrudur, həm fiziki, həm də psixoloji baxımdan asan deyildi. Amma məqsədim və iradəm mənə güc verdi. Əksinə, ana olmaq məni daha dözümlü etdi, həyatın dəyərini daha dərindən hiss etməyə başladım. İndi vaxtımı və enerjimi daha planlı bölürəm. Bəzən çətin olur, amma ailə və iş arasında tarazlıq saxlamağı öyrənmişəm. Qızım mənim üçün ən böyük motivasiyadır.
- Cəmiyyət tez-tez qadınları "ailə və ya karyera" seçimi qarşısında qoyur...
- Mən inanıram ki, qadın həm ailədə, həm də peşəsində uğur qazana bilər. Bunun üçün sadəcə, dəstək, anlayış və inam lazımdır. Biz qadınlar cəmiyyətin yarısıyıq və bu, böyük gücdür. Öz nümunəmlə göstərmək istəyirəm ki, analıq və peşəkar fəaliyyət bir-birinə mane olmur, əksinə – bir-birini daha da gücləndirir.
Leyla Eminova
