Idman.biz
"Düşünmürəm ki, etdiyim fənd növbəti 20-30 ildə təkrarlansın".
İdman.biz xəbər verir ki, bunu Oxu.Az-a Çinin Çenqdu şəhərində keçirilən Dünya Oyunlarında yerinə yetirdiyi inanılmaz elementlə gümüş mükafata sahib çıxan, adından söz etdirən azərbaycanlı gimnast Tofiq Əliyev deyib.
"Yarışda qızıl medal qazananda daha çox danışılmaq nəyə desən, dəyər, amma qızıl medala dəymir. Qızıl yox, gümüş medal qazandım. Lakin bu hərəkətlə bir çox tamblinq həvəskarlarının sevimlisi oldum. Bu hərəkətdən sonra tamblinq həvəskarları Beynəlxalq Olimpiya Komitəsinin rəsmi "Instagram" səhifəsinə hücum çəkdilər ki, tamblinq nəyə görə hələ də olimpiya idman növü sayılmır?", - Əliyev bildirib.
İdmançı qeyd edib ki, valideynlərinin qərarı ilə bir vaxtlar güləşlə məşğul olsa da, sonra öz qərarı əsasında gimnastikaya qayıdıb.
"Daha çox medal qazanmaq istəyirəm. amma ondan da çox bir neçə element var ki, onları etmək istəyirəm. Ondan sonra karyeramı rahat başa vura bilərəm. Və təbii fərdi yarışlarda Avropa və dünya qızıl medallarını qazanmaq istəyirəm", - Əliyev əlavə edib.
Gimnast hazırda bir neçə idman növü ilə mşğul olduğunu deyib. Onların arasında boks, güləş, tennis və futbol da var: "Tamblinqdən sonra yəqin ki, o növlərdə peşəkar olmayacağam. Amma bütün idman növlərinə həvəs göstərirəm".
O, gələcəkdə tamblinq üzrə milli komandanın məşqçisi olmaq arzusunu da gizlətməyib.
Əliyev Çində yerinə yetirdiyi və son günlər sosial şəbəkələrdə geniş yayılmış element barədə də danışıb: "Məni tanıyanlar bilir ki, bəzən inanılmaz yuxular görürəm. Sonra onları reallaşdırmağa çalışıram. Bu da onlardan biri idi. İndiyə qədər yuxuda tamblinq barədə gördüyüm hər şey reallığa çevrilib. Yarışdan haradasa 3 ay əvvəl bu etdiyim hərəkəti yuxumda gördüm. Ertəsi gün köməkçi məşqçi Rahib Əliyevlə qərara aldıq ki, bunu yoxlayaq. Baş məşqçi onda iclasda idi. Birinci cəhd uğursuz oldu. İkincidə isə ayaqüstə düşdüm. Sonradan Dünya oyunlarında finala adladıqdan sonra "niyə də yox" dedik. Mən bu barədə qərarımı məşqçiyə bildirəndə, onunla zarafat etdiyimi fikirləşdi. Sonradan danışığımız ciddiləşdi və bu hərəkəti etdim".
İdmançı yaxın 20-30 ildə bu hərəkəti kiminsə təkrar edəcəyinə inanmır: "Çox riskli hərəkətdir".
İdman.biz
