Rano Muhammedova: ⁠“Gimnastikanın inkişafı üçün ən yaxşı şərait Milli Gimnastika Arenasındadır” - MÜSAHİBƏ

Özbəkistanın bədii gimnastika üzrə qrup hərəkətləri komandasının məşqçisi Rano Muhammedova Milli Gimnastika Arenasındakı təlim-məşq toplanışı ilə bağlı Azərbaycan Gimnstika Federasiyasına müsahibə verib.

İdman.biz xəbər verir ki, o, hazırlığı dəyərləndirib, paytaxtımız barədə fikirlərini açıqlayıb.

- Bakıdakı təlim-məşqləri necə qiymətləndirirsiniz?

- Buraya hazırlığa ilk dəfə deyil gəlirik. Adətən Bakıya səfərimiz əhəmiyyətli yarışlardan öncə olur. Sizin arenada bədii gimnastika ilə məşğul olmaq üçün çox yaxşı şərait var və bunun üçün Milli Gimnastika Arenasında məşq etmək qərarına gəldik. Azərbaycan Gimnastika Federasiyasına qonaqpərvərliyinə və ölkəmizlə dostluğuna görə minnətdarlığımızı bildiririk. Burada müsbət ab-hava var, hamı çox mehribandır. Xalqınıza, məşqçilərinizə, gimnastlarınıza, federasiya rəhbərliyinə minnətdarıq.

- ⁠Milli Gimnastika Arenası haqda nə deyə bilərsiz?

- ⁠Dünyada gimnastikanın inkişafı üçün yaradılan ən yaxşı şərait məncə buradadır. Arenada yalnız bədii gimnastika üzrə deyil, idman gimnastikası üzrə milli komandamız da məşq edib. Buradakı şərait çox gözəldir.

- ⁠Bakını gəzə bildinizmi?

- ⁠İçərişəhəri çox sevirik. Bu dəfə qızlar heç yerə çıxmadılar. Çünki önəmli yarışlara hazırlaşırıq. Gimnastların diqqətinin yayınmamasına çalışırıq. Artıq bir çox yeri görüb, zövq almışıq. Biz Bakını çox sevirik.

İdman.biz