İdman.biz
Tamblinq üzrə polşalı məşqçi Sebastiyan Sundel Azərbaycan Gimnastika Federasiyasının saytına müsahibə verib.
İdman.biz xəbər verir ki, o, Bakıda keçirilən təlim-məşq toplanışını dəyərləndirib, paytaxtımızla bağlı fikirlərini açıqlayıb.
- Azərbaycandakı təlim-məşq toplanışınız necə keçdi?
- 10 günlük hazırlıq keçdik. Burada Azərbaycanın ən güclü idmançıları ilə məşq etməyi sevir, onlardan texniki elementləri öyrənirik. Düşünürəm ki, sizin məşqçilərdən çox şey öyrənə bildik, çünki yığmanız bu idman növündə dünyanın ən yaxşılarındandır. Bu, idmançılarım üçün böyük motivasiyadır. Proses yaxşı gedir, amma, təəssüf ki, buraya gələ bilməyən, zədəli gimnastlarımız da oldu.
- Milli Gimnastika Arenasını bəyəndinizmi?
- Arena əladır. Sizdə olan avadanlıqlar Polşada yoxdur. Tamblinqdə uğur qazanmaq üçün əlimizdən gələni etməyə çalışırıq. Bura məşq üçün yaxşı yerdir.
- Bunadək ölkəmizdə olmuşduz?
- Bəli, ikinci dəfədir, buraya gəlirəm. İdmançılarımın isə ilk səfəridir, onlardan yalnız biri 3 il əvvəl mənimlə yarışda iştirak edib.
- Bakını gəzməyə vaxtınız olubmu?
- Gözəl paytaxtınız var, insanlar mehriban və dürüstdürlər. Onlar qayğıkeşdir və ehtiyac duyduğunuz halda sizə kömək etməyə hazır olurlar. Məncə, bura turistlər üçün yaxşı yerdir. Evə qayıdanda hamıya buraya gəlməyi tövsiyə edəcəyəm.
İdman.biz
