İdman.biz
Türkiyənin məşhur idman gimnastı Əhməd Öndər Azərbaycana səfər edəcək.
İdman.biz xəbər verir ki, bunu Azərbaycan Gimnastika Federasiyasının mətbuat xidməti açıqlayıb.
Paralel qollarda dünya, fərdi çoxnövçülükdə Avropa çempionatının gümüş medalçısı olan idman gimnastı Bakıda ustad dərsləri keçirəcək. Bu intensiv proqram zamanı iştirakçılar Əhməd Öndərin məşq metodikası, texnikası və dünya səviyyəsindəki təcrübələrindən faydalanacaq.
Ustad dərsləri həm gimnastlar, həm də bu sahəyə yeni başlayanlar üçün nəzərdə tutulub. Bu dərslərdə bütün yaş kateqoriyaları üzrə gimnastlar iştirak edə biləcək.
Tədbirlər dekabrın 6-da klublar, ertəsi gün milli komanda üçün təşkil olunacaq. Milli Gimnastika Arenasında baş tutacaq ilk günün ustad dərsi 10:00-da başlayacaq. Heydər Əliyev adına İdman Konsert Kompleksində təşkil olunacaq ikinci günün tədbiri isə 12:00-da start götürəcək.
İdman.biz
