İrina Kovalçuk: “Bakıdakı arena hər məşqçinin ən böyük xəyalıdır” - MÜSAHİBƏ

Bədii gimnastika üzrə Küveyt milli komandasının baş məşqçisi İrina Kovalçuk Azərbaycan Gimnastika Federasiyasının mətbuat xidmətinə müsahib verib.

İdman.biz xəbər verir ki, o, Bakıdakı təlim-məşq toplanışını dəyərləndirib, paytaxtımızla bağlı fikirlərini açıqlayıb.

- Təlim-məşq toplanışınız necə keçdi?

- Biz Bakıya bacarıqlarımızı artırmaq üçün gəlmişik. Arenada əla şərait yaradıldığından buraya gəlməyi sevirik.

- Hansı emosiyalarla evə qayıdacaqsınız? Burada hansı təcrübələri qazandınız?

- Buraya əsas heyətlə qarşıdakı mövsümə hazırlaşmaq üçün gəlmişik. Biz daha çox şeyə nail olmaq istəyirik. Küveytdə belə müəllimlərimiz olmadığı üçün burada xoreoqrafiya müəllimlərindən bir neçə dərs almağı planlaşdırdıq. Ümid edirəm ki, bu dərslərdən sonra daha da irəliləyəcəyik.

- Milli Gimnastika Arenası haqda nə deyə bilərsiniz?

- Arena möhtəşəmdir. Belə arena, yəqin ki, hər məşqçinin ən böyük xəyalıdır. Burada çoxlu gimnastika xalçası var. Onlar çox keyfiyyətlidir. Bu bizə çox xoş təsir bağışladı və burada olduğumuz üçün çox xoşbəxtik.

- İdmançılarımız haqda nə deyə bilərsiniz?

- Paris-2024 Yay Olimpiya Oyunlarına baxdım. Sizin gimnastlarınızla fəxr edirəm. Yaxşı nəticələr göstərdilər.

- Şəhəri gəzə bildiniz?

- Bakını sevirəm. Bu, paytaxtınıza ilk səfərim deyil. Düşünürəm ki, burada olduğum müddətdə çox yeri gördüm. Olduqca da bəyəndim.

- Mətbəximiz xoşunuza gəldi?

- Əlbəttə, sizin heyrətamiz mətbəxiniz var.

İdman.biz