Idman.biz
Yekunlaşan gənclər arasında Azərbaycan çempionatı qılıncoynatma idmanı ilə bağlı bir çox suallar üzərində düşünməyə əsas verdi. Xüsusilə də yerli qılıncoynatmanın "arxa cəbhəsinin" nə dərəcədə güclü olması və gənc nəslin nümayəndələrindən kimlərin yaxın gələcəkdə yığmanın hazırkı liderlərini əvəz etməyə hazır olduğu məsələləri ön plana çıxdı.
Bəs gənclərdən konkret olaraq kim artıq bu gün böyüklər arasında da nəticə göstərməyə hazırdır?
Bu sualla İdman.Biz Azərbaycan yığmasının qılıncoynatma üzrə baş məşqçisi Çingiz Mustafayevə müraciət edib.
"Gənclər arasında keçirilən çempionatın nəticələrindən çox razıyam. Bu yarış əyani şəkildə göstərdi ki, qılıncoynatmamızın həm sablya, həm də şpaqa növlərində gələcəyi var. Qızlar arasında artıq bu gün çempion Xədicə Həsənli ilə yanaşı, şpaqaçı qadınlardan Nəzrin Mehdiyeva və Aynur Quliyeva da böyüklərdən ibarət komandada çıxış etməyə hazırdır. Sablyaçı qızlar arasında isə çempion Leyla Əhmədova ilə yanaşı, çox güclü Valentina Zeynalova var. Sadəcə bu çempionatda onun bəxti gətirmədi və mükafatçılar sırasına düşə bilmədi" – deyə Çingiz Mustafayev vurğulayıb.
Azərbaycan yığmasının baş məşqçisi əlavə edib ki, gənc oğlanlar arasında da kifayət qədər istedadlı idmançılar var:
"Belə ki, şpaqa növündə çempion və gümüş mükafatçı Mirxətai Məmmədov və Vahab Fətullayev artıq uzun müddətdir böyüklərdən ibarət komandada çıxış edir və bunu kifayət qədər uğurla edirlər. Sablya üzrə isə Rəsul Əliyev Rəsulu və Abbas Hüseynov istənilən vaxt böyüklər arasında keçirilən turnirlərdə layiqincə çıxış edə bilərlər".
