İdman.biz
Bakıda keçirilən "TeamGym" üzrə Avropa çempionatı sensasiyasız başlayıb.
İdman.biz xəbər verir ki, kişilərin yarışı gözlənildiyi kimi Danimarkanın qələbəsi ilə başa çatıb.
Bu növdə hegemonluq edən şimallılar tarixdə 13-cü qızıl medalı qazanıb. 15-ci dəfə təşkil olunan qitə birinciliyində yalnız iki dəfə başqa ölkənin kişilərdən ibarət yığması çempion olub. Danimarka 13 çempionluqla yanaşı 4 gümüş və 2 bürünc də əldə edib.
1996-cı və 2020-ci illərin qızılını İsveç əldə edib. Skandinaviyalılar Bakıda 2-ci olublar. İsveçin hesabında ümumilikdə 2 qızıl, 9 gümüş və 5 bürünc var.
3-cü yeri tutan Norveç 6-cı dəfə bürünc əldə edib. Onların yeganə gümüşü iki il əvvələ təsadüf edib. Həmin vaxt Norveç İsveçi qabaqlayıb. Ümumilikdə isə 2022-ci ildəki üç ölkə yenə fəxri kürsüyə qalxıb. Maraqlıdır ki, Avropa çempionatları tarixində 7-ci dəfə Danimarka, İsveç, Norveç ardıcıllığı qeydə alınıb.
Qeyd edək ki, bu üç ölkədən başqa yalnız İslandiya (bir gümüş) və Böyük Britaniya (bir bürünc) medal sevinci yaşayıb.
İdman.biz
