Idman.biz
Azərbaycanın tamblinq və batut gimnastikası üzrə yığmaları Çinin Nankin şəhərində keçirilən dünya çempionatının təsnifat mərhələsində mübarizəyə başlayıblar.
İdman.Biz xəbər verir ki, yarışın ilk günündə Azərbaycan təmsilçiləri iki uğurlu nəticəyə imza atıblar: qarışıq sinxron cütlük növbəti mərhələyə vəsiqə qazanıb, tamblinq üzrə kişi komandası isə təsnifat mərhələsini birinci pillədə başa vurub.
Qarışıq sinxron cütlüklərin yarışında Selcan Mahsudova və Maqsud Mahsudov 50,250 xal toplayaraq səkkizinci yeri tutublar. Bu nəticə onların noyabrın 6-da keçiriləcək turnirin növbəti təsnifat mərhələsinə vəsiqə qazanmaları üçün kifayət edib. Final mərhələsi isə noyabrın 7-nə planlaşdırılıb.
Azərbaycanın tamblinq üzrə kişi yığması da uğurlu çıxış edib. Aleksey Karataşov, Mixail Malkin, Adil Hacızadə və Tofiq Əliyev komanda təsnifatında 87,200 xal toplayaraq birinci yeri tutublar və noyabrın 6-da keçiriləcək finalda iştirak hüququ qazanıblar.
Bundan əlavə, Azərbaycan idmançıları fərdi yarışlarda da yüksək nəticələr göstəriblər. Tofiq Əliyev 59,500 xalla təsnifat mərhələsinin lideri olub. Mixail Malkin 57,100 xalla dördüncü, Aleksey Karataşov 54,400 xalla 11-ci, Adil Hacızadə isə 52,900 xalla 18-ci yerdə qərarlaşıb. Beləliklə, Əliyev, Malkin və Karataşov noyabrın 6-da keçiriləcək turnirin növbəti mərhələsinə vəsiqə qazanıblar. Final isə noyabrın 7-də baş tutacaq.
Qeyd edək ki, dünya çempionatında Azərbaycanı üç batut gimnastı və dörd tamblinqçi təmsil edir. Maqsud Mahsudov və Selcan Mahsudova noyabrın 5-də fərdi təsnifat mərhələsində də çıxış edəcəklər. Maqsud Mahsudov və Hüseyn Abbasovdan ibarət kişi sinxron cütlüyü isə noyabrın 6-da təsnifat mərhələsində mübarizə aparacaq. Dünya çempionatı noyabrın 8-də başa çatacaq.
