Idman.biz
Azərbaycanın batut gimnastikası və tamblinq üzrə milli komandası Çinin Nankin şəhərində keçirilən 39-cu dünya çempionatını bir qızıl və iki gümüş medalla başa vurub.
İdman.Biz xəbər verir ki, 4–8 noyabr tarixlərində təşkil olunan yarışda altı qitədən 367 gimnast iştirak edib. İdmançılar müxtəlif proqramlar üzrə 16 dünya çempionluğu uğrunda mübarizə aparıblar.
Tamblinq millimiz üçüncü dəfə dünya çempionu olub
Azərbaycanın əsas uğuru tamblinq üzrə komanda yarışında qeydə alınıb. Mixail Malkin, Tofiq Əliyev, Adil Hacızadə və Aleksey Karataşovdan ibarət yığmamız təsnifat mərhələsini lider kimi başa vuraraq finala yüksəlib.
Həlledici mərhələdə 25 xal toplayan milli komandamız Danimarkanı bir, ABŞ-ni isə beş xal qabaqlayaraq qızıl medal qazanıb.
Beləliklə, Azərbaycan 2023 və 2025-ci illərdən sonra üçüncü dəfə tamblinq üzrə komanda yarışında dünya çempionu olub.
Tofiq Əliyev ilk fərdi gümüş medalını qazanıb
Tamblinq üzrə fərdi yarışda Tofiq Əliyev də fəxri kürsüyə yüksəlib. Təmsilçimiz finalda 29,700 xal toplayaraq dünya çempionatının gümüş medalını qazanıb.
Bu, onun fərdi proqramda dünya çempionatlarında əldə etdiyi ilk gümüş medaldır. Portuqaliyalı Vasko Peso qızıl, ABŞ təmsilçisi Keyden Braun isə bürünc medala sahib olub.
Digər gimnastlarımızdan Mixail Malkin mübarizəni 1/8 final mərhələsində başa vurub. Aleksey Karataşov ilk təsnifat mərhələsində 54,400 xal toplayaraq 11-ci pillədən ikinci təsnifat mərhələsinə yüksəlib, burada isə 26,800 xalla 13-cü olub. Adil Hacızadə ilk təsnifat mərhələsində 52,900 xalla 19-cu yeri tutub.
Qeyd edək ki, komanda yarışında qızıl medal qazanan yığmamızın üzvü Karataşov böyüklər arasında dünya çempionatında ilk dəfə iştirak edib.
Bacı-qardaş Azərbaycan gimnastikası tarixində ilkə imza atıb
Batut gimnastikasının qarışıq sinxron proqramında Selcan Mahsudova və Maqsud Mahsudov da tarixi nəticə göstəriblər.
Təsnifat və yarımfinal mərhələlərini uğurla keçən bacı-qardaş tandemi finalda 52,010 xal toplayaraq gümüş medal qazanıb.
Bu nəticə Azərbaycan gimnastikasının tarixində qarışıq sinxron proqram üzrə dünya çempionatlarında əldə edilən ilk gümüş medaldır.
Yarışda Belarus gimnastları qızıl, Yaponiya təmsilçiləri isə bürünc medala sahib olublar.
Selcan Mahsudova Olimpiya çempionunu qabaqlayıb
Selcan Mahsudova qadınların fərdi batut proqramında da diqqət çəkib. O, yarımfinalda 56,140 xal toplayaraq altıncı pillədən finala yüksəlib.
Təmsilçimiz bu mərhələdə Paris-2024 Yay Olimpiya Oyunlarının çempionu Brioni Peyci altı pillə qabaqlayıb.
Noyabrın 8-də keçirilən finalda Mahsudova 56,580 xal toplayaraq dünya çempionatını altıncı yerdə başa vurub.
Kişilərin fərdi proqramında Maqsud Mahsudov yarımfinalda 37,850 xalla 20-ci olub. Maqsud Mahsudov və Hüseyn Abbasovdan ibarət sinxron cütlük isə ilk təsnifat mərhələsində 50,900 xal toplayaraq ikinci təsnifat mərhələsinə yüksəlib və burada 15-ci pilləni tutub.
Abbasov da böyüklər arasında dünya çempionatında ilk dəfə iştirak edib.
Beləliklə, Azərbaycan gimnastları Nankində keçirilən dünya çempionatını bir qızıl və iki gümüş medalla tamamlayıblar.
Qeyd edək ki, millimizin uğurları 8 Noyabr - Zəfər Günü ərəfəsinə və bayram gününə təsadüf edib.
