Idman.biz
Avstraliyalı gimnast Aleksandra Kiroi-Boqatıreva Paris Olimpiadasından sonra aktiv idman karyerasını başa vursa da, idmanda yeni bir statusda qalmaqdadır. Üç il Bakıda məşq edən idmançı Melburnda öz Akademiyasını yaradıb və gənc gimnastların yeni nəslini hazırlayır.
Yeni fəaliyyət istiqamətində qazandığı uğurlar, Azərbaycanla bağlı xatirələri və Bakıdakı dostları barədə A.Kiroi-Boqatıreva İdman.Biz-ə danışıb.
- Kiroi Akademiyasının yaradılması ideyası necə yarandı?
- Bu ideya idmana olan saf sevgidən doğdu. Bədii gimnastikada 17 ildən artıq yol keçdikdən sonra – beynəlxalq yarışlardan tutmuş dünya səviyyəli məşqçilərlə çalışmağa qədər – Viktoriya ştatında həqiqətən dəyərli bir iş qurmağa hazır olduğumu hiss etdim. Elə bir məkan yaratmaq istəyirdim ki, burada idmançılar özlərini dəstəklənmiş, ruhlandırılmış və təhlükəsiz hiss etsinlər, valideynlər isə uşaqlarının müsbət və yaxşı strukturlaşdırılmış mühitdə inkişaf etdiyinə əmin olsunlar.
- Akademiyanın fəaliyyəti və bu il əldə olunan nəticələr sizi qane edirmi?
- Bəli, tam şəkildə. 2025-ci il bizim ilk rəsmi ilimiz oldu və ili çox güclü, müsbət notlarla başa vurduq. Gimnastlarımız cəmi bir neçə ay ərzində nəzərəçarpacaq inkişaf göstərdilər, məşqçi heyəti maksimum səylə çalışdı, ştat və milli səviyyəli yarışlarda isə əla nəticələr əldə etdik. Amma ən vacibi odur ki, Akademiya daxilində formalaşan mədəniyyət məhz mənim düşündüyüm kimidir – idmançı yönümlüdür.
- Siz gimnast kimi üç il Bakıda məşq etmisiniz. O dövrü necə xatırlayırsınız?
- Məni həm idmançı, həm də şəxsiyyət kimi formalaşdıran azərbaycanlı ailəmə çox minnətdaram. Dəstəyə, mentorluğa və uğura aparan düzgün istiqamətə görə onlara borcluyam. Milli Gimnastika Arenasında hazırlıq mənim üçün unikal təcrübə idi. Bakıdakı Dünya Kuboku mərhələlərində beş dəfə çıxış etdim, Avropa Kubokunda və dünya çempionatında iştirak etdim. Biz hər gün 8–10 saat məşq edirdik.
- Azərbaycanla əlaqəni necə qoruyursunuz?
- Ən yaxın dostlarımın hamısı Bakıdadır. Zöhrə Ağamirova, Arzu Cəlilova, qrup hərəkətləri üzrə komanda, böyüklər, eləcə də aşağı yaş qruplarından olan gimnastlar. Məşqçilər də daim dəstək göstərirlər. Onlar mənim ailəmdir və həmişə mənimlə olacaqlar.
-Hazırkı fəaliyyətinizdə sizi nə ilhamlandırır?
- Hüquq fakültəsinin tələbəsi, olimpiyaçı və idmançı hüquqları üzrə komitələrin üzvü kimi Akademiyanın möhkəm təməl üzərində qurulması üçün lazım olan bütün aspektləri bir araya gətirə bilirəm. Gimnastlarımızın inkişafı, məşqlərə olan həvəsi və ailələrin proqramımıza göstərdiyi etimad məni ilhamlandırır. İdmançının çətinlikləri aşmasını, özünə inam qazanmasını və ya şəxsi məqsədinə çatmasını izləmək inanılmaz dərəcədə dəyərlidir. Hörmətin və rifahın əsas götürüldüyü bir icma yaratmaq məni hər gün motivasiya edir.
- İdman karyeranız bir çox əlamətdar hadisələrlə zəngin olub. Hansı xatirələr sizin üçün daha doğmadır?
- Karyeram ərzində 300-dən çox medal qazanmışam və onların hər biri Paris Olimpiadasına aparan yolda bir addım olub. Ən yaddaqalan məqamlar sırasında 2022-ci il Birlik Oyunlarında qazandığım qızıl medal, eləcə də 2018-ci il Birlik Oyunlarında əldə etdiyim bürünc medal var. Həmin vaxt böyüklər arasında ilk ilim idi və yığmanın ən gənc gimnastı idim. Bu, 8 mindən çox tamaşaçı qarşısında ilk çıxışım idi və təzyiqə tab gətirərək fərdi medal qazanan yeganə avstraliyalı idmançı oldum.
- Özünüzü indi necə görürsünüz – Akademiya direktoru, məşqçi və hüquq tələbəsi kimi?
- Bu mərhələ həyatımda keçid və inkişaf dövrüdür. Yüksək səviyyəli idman karyeramı başa vuraraq yeni peşə yollarının qurulmasına fokuslanmışam. Məşqçilik mənə çox təbii şəkildə gəldi və idmançılarla işləməkdən səmimi zövq alıram. Hüquq təhsili isə bu fəaliyyəti tamamlayaraq idarəetmə və idmançıların müdafiəsi məsələlərini daha dərindən anlamağıma kömək edir. Bu sahələri gimnastikada gücləndirməyə çalışıram.
- Gələcək üçün özünüz və Akademiya qarşısında hansı məqsədləri qoymusunuz?
- Kiroi Akademiyasının qarşısında çoxlu məqsədlər var və biz hələ yolun başlanğıcındayıq. Əsas prioritetimiz hər zaman gimnastlar olacaq – onların təhlükəsizliyi, rifahı və həm idmançı, həm də şəxsiyyət kimi inkişafı. Daha çox uşağın bədii gimnastikaya aşiq olmasını və bu idman növünün Viktoriya ştatında inkişafını istəyirəm. Uzunmüddətli perspektivdə proqramları genişləndirmək, inkişaf yollarını möhkəmləndirmək və Kiroi Akademiyasını bədii gimnastika üzrə aparıcı mərkəz kimi təsdiqləmək niyyətindəyəm.
Zəki Feyzullayev
