Rəcəb Fərəczadə deyib: "Biz Azərbaycan milli komandasının dünya çempionatında yarımfinala qədər asanlıqla yüksələcəyinə ümid edirik."

Rəcəb Fərəczadə Azərbaycan millisinin Bakıda təşkil olunan minifutbol üzrə dünya çempionatında yarımfinala qədər rahat şəkildə irəliləyəcəyini düşünür.

İdman.biz xəbər verir ki, Azərbaycanın minifutbol üzrə U-23 yığmasında çalışan mütəxəssis bu barədə "Report"a açıqlamasında bildirib.

O, komandanın mundiala çox yaxşı hazırlaşdığını söyləyib: "Hətta bununla bağlı Azərbaycan çempionatını mart ayında bitirmişdik. Millimiz təlim-məşq toplanışı və yoldaşlıq görüşləri keçirib. Düşünürəm ki, komanda tam hazırdı. Heyət "Birbaşa Bakı" və "Zirə" klublarının üzvlərindən təşkil olunub. "Birbaşa Bakı" Çempionlar Liqasının son qalibidir. "Zirə" də yaxşı komandadır. Düşünürəm ki, Azərbaycan yığması yarımfinala qədər rahat şəkildə irəliləyə bilər. Komandadan ən azı bunu gözləyirik".

Fərəczadə dünya çempionatında hansı yığmaları favorit görməsi ilə bağlı sualı da cavablandırıb: "Azərbaycan millisindən başqa, Rumıniya yığması da daim favorit qismində çıxış edib. Çexiya, Slovakiya, Serbiya da yaxşı komandalardır. Ümumiyyətlə, adlarını çəkdiyim kollektivlər həmişə iddialı olublar. Digərlərinin oyunlarını isə görməmişəm. Türkiyənin də çox döyüşkən komandasının olduğunu deyirlər".

Qeyd edək ki, Milli Gimnastika Arenasında təşkil olunan dünya çempionatı iyunun 1-də başa çatacaq. A qrupunda yer alan Azərbaycan millisi bu gün, saat 20:30-da Bəhreyni sınağa çəkəcək.

İdman.biz