“Zirə” gününü yaşayır. Komanda qalib gələ bilmirsə, məğlub olmamağı qazanc bilir. Bu səbəbdən komanda 12 tura artıq 5 dəfə xal bölüb.
Bəlkə də Rəşad Sadıqovun strateji yanaşması belədir. O, mövsüm boyu əziyyət çəkmək, hər tura final kimi yanaşmaq istəyir. Hazırkı gedişat məhz bundan xəbər verir. Vəziyyət faciəvi deyil, amma yaxşı da sayıla bilməz. Qəsəbə təmsilçisi yuxarı pillələrdə dolaşsa da, əsas rəqibləri xal fərqini artırır və bu gedişlə “Zirə” mövsümün qalan hissəsini 4-cü pilləni tutmaq üçün mübarizəyə sərf edəcək.
Belə baxanda “İmişli” ilə səfər matçından xalla qayıtmaq pis nəticə sayılmamalıdır. Komandanın 2:0 hesablı üstünlüyü 5 dəqiqə ərzində əldən verdiyini nəzərə aldıqda isə “qartallar”ın xüsusilə müdafiədə ciddi problemlərnin olduğu qeyd edilməlidir. “Zirə” cəmi 2 oyunda top buraxmayıb və ardıcıl 9 matçdır rəqib qoluna üzülür. 18 qol vurub 17 top buraxmaq etibarlı müdafə üslubu ilə tanınan Sadıqovu razı sala bilməz.
Doğrudur, “Zirə” rəqibinə epizod vermədən, talesiz penaltlərlə 2 top buraxdı. Amma rəqib topu həmin yerədək çatdırırsa, deməli, dayaq bölgəsində, cinahlarda problemlər var və komanda ansambl kimi görünə bilmir. Qəsəbə təmsilçisi zədəlilər baxımından ciddi problemlər yaşadığından heyətin komplektləşdirilməsi gecikir, hər dəfə hansısa önəmli oyunçu kənarda qalır. Bu da nəticələrə təsir göstərir. Gəl ki, bu da elə “Zirə”nin öz problemidir.
“İmişli” xal qazansa da, komandanın yaxşı çıxış etdiyini demək olmaz. Jorj Kaşkilyanın vaxtında komanda daha inamlı idi. Bir çox oyunçunun şəxsi performansının zəiflədiyi aşkar görünür.
“Sumqayıt”ın dünənki darmadağınının səbəbkarı özü oldu. Lukas Blek ilk yarım saatın tamamında iki sarı vərəqə almağı və komanda yoldaşlarının əziyyətini yerə vurmağı bacardı. Hətta onun ilk kobudluğu zamanı birbaşa qırmızı vərəqə də göstərmək olardı. “Sabah” güclü idi və qalib gəlməyin yolunu tapacaqdı, rəqibin yarımmüdafiəçisi onların işini asanlaşdırdı.
“Barselona” ilə oyun öncəsi əldə edilən böyükhesablı qələbə “Sabah” üçün motivasiya olmalıdır. Valdas Dambrauskas əsas oyunçuları qorudu, eyni zamanda vacib 3 xalı aktivə yazdırdı. Komandanın fasilədən yaxşı yararlandığı aşkar görünürdü. Ümid edək ki, Çempionlar Liqası matçında da yorğunluqdan qurtulmuş, daha təravətli komanda görəcəyik.
FƏRİD