Idman.biz
"Neftçi" futbol komandasının baş məşqçisi Yuri Vernidub oyunçuların gündəlik hazırlıq proqramında dəyişiklik edib.
İdman.Biz sportinfo.az-a istinadən xəbər verir ki, komandanın fiziki durumunun aşağı olmasını görən çalışdırıcı məşq saatını artırıb.
Əgər "ağ-qaralar" Samir Abasovun vaxtında 50 dəqiqə, maksimum 1 saat çalışırdısa, bundan sonra məşq prosesi 1,5 saat davam edəcək.
Ukraynalı mütəxəssis artıq hər bir oyunçunun fiziki göstəriciləri ilə şəxsən maraqlanır. Buna əsasən, günlük, həftəlik və aylıq hesabat tərtib olunacaq.
Bu arada Yuri Vernidubun futbolçulardan əsas tələbi məlum olub. Təcrübəli mütəxəssis komanda üzvlərindən 90 dəqiqə meydanda hərəkət etməyi istəyib.
Bugünlərdə bakılılarla 1,5 illik müqavilə bağlamış 59 yaşlı çalışdırıcı az qaçan, hər top uğrunda sonadək çarpışmayan, ikili mübarizələrdən yayınan oyunçulara əsas heyətdə şans verməyəcəyi barədə xəbərdarlıq edib.
Ukraynalı "ağ-qaralar"a son olaraq çalışdırdığı "Krivbass"ı misal çəkib. Bildirib ki, Krivoy Roq təmsilçisi onun başçılığı altında 2024-cü ildə uğurlu mövsüm keçirib və ölkə çempionatında üçüncü yer tutub.
Yuri Vernidub "Krivbass"ın bir matçından nümunə gətirib. Əvvəlki komandasının ən pis halda oyun ərzində 118 min metr qaçdığını xatırladıb və müqayisə aparıb.
"Neftçi"nin avqustdan bəri keçirdiyi qarşılaşmaların göstəricilərini incələyən yeni baş məşqçi bu rəqəmin 90 min metri keçməməsini təəssüf hissi ilə vurğulayıb.
Deyib ki, meydanda bu qədər az hərəkət eləyən komandanın uğurlu nəticələr qazanması müşkül işdir. O, bundan sonrakı mərhələdə fiziki hazırlığa xüsusi diqqət yetirəcəyini söyləyib.
