Siyasət Əsgərov "Neftçi"nin "Fomget" ilə qarşılaşması barədə fikirlərini bölüşüb

"Sabiq komandam "Fomget" ilə oynayacağımız üçün duyğulandım". Sport24.az xəbər verir ki, bu sözləri AZƏRTAC-a açıqlamasında qadın futbolçulardan ibarət "Neftçi" komandasının baş məşqçisi Siyasət Əsgərov UEFA Çempionlar Liqasının I təsnifat mərhələsinin yarımfinalında Türkiyənin "Fomget" klubuna rəqib olmaları barədə danışarkən deyib.

O, Türkiyə təmsilçisinin güclü kollektiv olduğunu bildirib: "Demək olar ki, rəqibi tanıyıram. Bu komanda ilə Türkiyə çempionu olmuşam və Çempionlar Liqasında iştirak etmişəm. İndi isə rəqib kimi üz-üzə gələcəyik. "Fomget" qadın futbolunda ən çox yatırım edən klublardan biridir. Heyətində yaxşı oyunçular var. Bir neçə gün əvvəl baş məşqçiləri ilə yollar ayrılıb. Hazırda həmin vəzifə boşdur. Komandama çox inanıram. Bütün fikrimi Türkiyə klubu ilə matça yönəltmişəm. Həmin görüşün harada keçiriləcəyi bəlli deyil. Əgər qarşılaşma Ankarada baş tutsa, mənim üçün fərqli hisslər olacaq. Çünki paytaxtda yerləşən stadionda "Fomget" komandası ilə kubok qazanmışam".

S.Əsgərov bəzi mövqelərə transferlər edəcəklərini söyləyib: "Müdafiə, yarımmüdafiə və cinahı gücləndirmək istəyirik. Ola bilsin ki, Türkiyədə çıxış edən azərbaycanlı futbolçuları transfer edək. Hələlik heç biri ilə razılığa gəlməmişik".

Qeyd edək ki, "Neftçi" "Fomget"lə iyulun 30-da qarşılaşacaq. Paytaxt təmsilçisi Türkiyə təmsilçisini məğlub edəcəyi halda, finalda İsrailin "Kiryat" klubu ilə üz-üzə gələcək. Bu duelin qalibi II təsnifat mərhələsinə yüksələcək.