Idman.biz
"Yay təlim-məşq toplanışından müəyyən ailə səbəblərinə görə tez qayıtdım. Xəstələndiyim üçün 5-6 gün də komandadan ayrı düşdüm. Amma indi hər şey yaxşıdır, ideal formaya düşməyə çalışıram. Baş məşqçi şans verəcəyi təqdirdə qarşıdakı oyunlarda komandama kömək etməyə çalışacağam".
İdman.biz xəbər verir ki, bunu Futbolinfo.az-a açıqlamasında "Turan Tovuz"un kapitanı Şəhriyar Əliyev deyib.
33 yaşlı müdafiəçi baş məşqçidən meydanda oyun şansı qazanmamasının səbəbini izah edib: "Fiziki durumum indi yaxşıdır. Bəzi səbəblərdən komanda ilə tam təlim-məşq toplanışında iştirak edə bilmədim. Üzərimdə işləyirəm ki, qarşıdakı matçlarda baş məşqçi tərəfindən şans qazanam. Nəinki mən, kollektivdəki 25-26 futbolçunun hər biri əlindən gələni etməyə çalışır. Düşünürəm ki, böyüdüləcək problem yoxdur. Baş məşqçinin şans verəcəyi təqdirdə əlimdən gələni edəcəyəm. Deyərdim ki, fasilə tam yerinə düşdü".
Əliyev komandasının Misli Premyer Liqasının 4-cü turunda "Qəbələ" ilə oyuna hazırlaşdığını da bildirib: "Bir neçə gün istirahətdən sonra ilk məşqə çıxdıq. "Neftçi" ilə oyundan sonra komandaya 3 gün istirahət verildi. Çalışacağıq ki, bu fasilədə fiziki durumumuzu yenidən yaxşı formaya gətirək. Zədəli futbolçularımız növbəti oyuna qədər tam sağalmağa çalışacaqlar. Fasilədən sonra "Qəbələ" ilə oyunumuz var. Rəqibimiz də zəif deyil, son oyunlarına baxanda yaxşı komanda olduqları görünür. Çalışacağıq ki, həmin oyuna daha motivasiyalı və hazırlıqlı çıxaq".
Tovuz təmsilçisinin kapitanı cari mövsüm hədəflərini də açıqlayıb: "Kollektiv olaraq qarşıya məqsəd qoymuşuq. Ötənilki səhvləri təkrarlamamalıyıq. Çempionatda ideal formada olmağa çalışacağıq ki, xallar qazanaq, çünki itirdiklərimiz sonra bizə problem yaradır. Bunun üçün əlimizdən gələni edəcəyik. 3 oyunda 6 xalımız var. Qarşıdakı oyunlarda daha yaxşı nəticələr göstərmək üçün əlimizdən gələni edəcəyik".
İdman.biz
