Idman.biz
"Karvan-Yevlax"ın nigeriyalı yarımmüdafiəçisi Qavi Tompsonun Futbolinfo.az-a müsahibəsi
– Misli Premyer Liqasının 3-cü turunda "Qarabağ"a məğlub oldunuz (0:2). Oyunla bağlı fikirləriniz necədir?
– "Qarabağ" çox yaxşı komandadır. Buna baxmayaraq, biz hər oyuna xal qazanmaq üçün çıxırıq. Məqsədimiz bu görüşdən də yaxşı nəticə ilə ayrılmaq idi. Meydançanı xalsız tərk etdiyimizə görə məyus olduq.
– "Karvan-Yevlax"ın ilk 3 tur ərzindəki ümumi çıxışını necə dəyərləndirirsiniz? Razısınız ki, 3 tura 4 xal komandanız üçün yaxşı nəticədir?
– İlk 3 tur bizim üçün pis keçmədi. Məqsədimiz mövsümün əvvəlində mümkün qədər çox xal toplamaq idi. Təkcə "Qarabağ"la görüşdə meydanı xalsız tərk etdik.
– Milli komandaların oyunları ilə əlaqədar çempionatda yaranmış fasilə komandanıza necə təsir edəcək?
– Düşünürəm ki, fasilə bizə ilk 3 turda çatışmayan cəhətlərimizin üzərində daha çox işləmək imkanı verəcək. Bundan əlavə, fasilə bizə liqa bərpa olunanda daha güclü olmağa şərait yaradır.
– Liqanın 4-cü turunda "Şamaxı" ilə qarşılaşacaqsınız. Şansları necə dəyərləndirirsiniz?
– Ümid edirəm ki, "Şamaxı" ilə oyunda qalib gələcəyik. Bunu bacarsaq, "Qarabağ"a məğlubiyyətdən sonrakı əhval-ruhiyyəmizi yenidən yaxşılaşacaq, qələbə ruhu komandaya qayıdacaq və daha da motivasiyalı olacağıq.
– Azərbaycan Premyer Liqası barədə düşüncələriniz necədir? Liqaya uyğunlaşmaq üçün çətinlik çəkmirsiniz ki?
– Çempionatın səviyyəsi yüksəkdir, komandalar güclüdür. Ona görə hələ də liqaya uyğunlaşıram və ümid edirəm ki, oyundan-oyuna hər şey mənim üçün daha da yaxşı olacaq.
– Uzun illərdən sonra Premyer Liqaya qayıdan "Karvan-Yevlax"ın gücü ilk mövsümü neçənci pillədə bitirməyə çatacaq?
– Düşünürəm ki, bizim üçün əsas məqsəd liqada qalmaq və oyundan-oyuna irəliləməkdir. Mövsümün sonunda liqanı yaxşı mövqedə başa çatdıracağımıza ümidliyəm. Bunu bacaracaq gücdəyik.
İdman.biz
