Idman.biz
Türkiyə futbol millisinin yeni baş məşqçisi Sergen Yalçınla dördillik müqavilə imzalanıb. 53 yaşlı mütəxəssis Vinçentso Montellanı əvəzləyib.
İdman.Biz xəbər verir ki, imzalanma mərasimi Türkiyə Futbol Federasiyasının (TFF) Rivadakı mərkəzində keçirilib.
Tədbirdə çıxış edən TFF prezidenti İbrahim Hacıosmanoğlu Yalçının futbol biliyinə və təcrübəsinə güvəndiklərini bildirib. O, milli komandanın beş ildən sonra yenidən türkiyəli mütəxəssisə həvalə olunmasından məmnunluğunu ifadə edib.
Sergen Yalçın isə yeni vəzifəsinin karyerasında xüsusi yer tutduğunu vurğulayıb:
"Bu, karyeramın ən mühüm günlərindən biridir. Milli komanda hər şeydən üstündür. Qarşıda bizi çox uğurlu günlərin gözlədiyinə inanırıq. Bu yolda hər kəsin dəstəyinə ehtiyacımız var".
Mütəxəssis özünü xalqın baş məşqçisi adlandıraraq milli komandada birlik və komanda ruhunu gücləndirmək istədiyini bildirib.
O, futbolçuların seçimində ədalətli davranacaqlarını da qeyd edib. Yalçının sözlərinə görə, yığmanın qapısı bütün oyunçuların üzünə açıq olacaq və heyət müəyyənləşdirilərkən onların performansı əsas götürüləcək.
Yeni baş məşqçinin köməkçiləri də müəyyənləşib. Serhat Mert məşqçilər korpusunun koordinatoru, Murat Kaytaz köməkçi məşqçi, Niyazi Eniseler və Emre Gürbüz fiziki hazırlıq üzrə məşqçilər, Erol Ayçiçek isə qapıçılar üzrə məşqçi vəzifəsini icra edəcək.
Tarık Yiğit Egeli və Okan Aydıner oyun və performans analitikləri, Muhammet Nuri Püren isə onların köməkçisi olacaq.
Qeyd edək ki, Sergen Yalçın futbolçu karyerası ərzində Türkiyə millisində 37 oyun keçirib və beş qol vurub. O, məşqçi kimi 2020/2021 mövsümündə "Beşiktaş"ı Türkiyə çempionluğuna və ölkə kubokunda qələbəyə aparıb.
Yeni müqaviləyə əsasən, Yalçın Türkiyə millisini 2030-cu ilə qədər çalışdıracaq. Komandanın əsas hədəfləri arasında 2028-ci il Avropa çempionatı və 2030-cu il dünya çempionatı yer alır.
