Sport24.az
Juninyonun "Qarabağ"dan gedişi dəqiqləşib. Braziliyalı futbolçu yol üstündədir, "Flamenqo"ya gedir. Hələ ki rəsmən açıqlanmasa da, Juninyonun 5 milyon avroya satıldığı deyilir.
Bu məsələdə ortaya bir sual çıxır - Kadini Rusiya klubuna 5 milyon avroya satan "Qarabağ", Juninyonu Braziliyanın məşhur klubuna ucuza vermədimi?
Sport24.az xəbər verir ki, Sportal.az saytına açıqlama verən "Qarabağ" klubunun İdarə Heyətinin üzvü Asif Əsgərov xaricə klublara baha qiymətə oyunçu satmağın çətinliklərindən danışıb:
"Biz tərəfdən baxanda, əlbəttə ki, Juninyonun dəyərini 10 milyon avro qiymətləndirə bilərik. Amma reallıq fərqlidir. Bu məsələdə çempionatın səviyyəsi, futbolçuların maaş həddi və s. nüanslar önəmli rol oynayır.
Futbolçunun dəyərinin göstəricisi olan bir çox səbəblər var. Bizdə isə futbolçunun dəyərini artıran göstəricilər demək olar ki, yoxdur. Yalnız "Qarabağ"ın Avropada sərgilədiyi futbol var ki, buna görə Juninyo kimi futbolçulara maraq yaranır.
Gələcəkdə çempionatımızın səviyyəsi qalxmalıdır ki, xarici klublar üçün Premyer Liqamız göstəriciyə çevrilsin".
