Idman.biz
Niderlandın "Ayaks" klubu hazırda azad agent statusunda olan "Arsenal"ın sabiq müdafiəçisi Takehiro Tomiyasunu transfer etmək niyyətindədir.
İdman.Biz xəbər verir ki, "Voetbal International" nəşrinin məlumatına görə, yapon futbolçu iyul ayında London klubundan ayrıldıqdan sonra sərbəst qalıb.
Son illərdə dizindən ciddi problemlər yaşayan Tomiyasu ötən mövsümdə "Arsenal"ın heyətində meydanda cəmi altı dəqiqə keçirib. Fevral ayında əməliyyat olunan müdafiəçinin bir neçə ay sonra müqaviləsi tərəflərin qarşılıqlı razılığı ilə ləğv edilib. Bu da futbolçuya vətənində xüsusi reabilitasiya proqramı keçməyə imkan verib.
Məlumata görə, Tomiyasu bərpa prosesində ciddi irəliləyiş əldə edib. Lakin tam formada qayıtmaq üçün onun klub mühitində çalışmasına ehtiyac var. Müdafiəçi əsas hədəflərindən birinin 2026-cı il dünya çempionatında Yaponiya millisinin heyətində çıxış etmək olduğunu gizlətmir.
"Ayaks" rəhbərliyi futbolçunun hər iki cinahda oynamaq bacarığını və beynəlxalq təcrübəsini yüksək qiymətləndirir. Klub transferin reallaşması üçün imkanları dəyərləndirməyə davam edir.
Qeyd edək ki, "Qarabağ" - "Ayaks" matçı dekabrın 10-da Tofiq Bəhramov adına Respublika stadionunda keçiriləcək və saat 21:45-də başlayacaq.
