Idman.biz
Türkiyə futbolunun iki köklü klubu "Qalatasaray" və "Trabzonspor" sabah tarixlərində 142-ci dəfə üz-üzə gələcək.
İdman.Biz xəbər verir ki, tərəflər Super Kubok yarımfinalı çərçivəsində sabah Bakı vaxtı ilə saat 21:30-da qarşılaşacaq.
"Trabzonspor"un Super Liqaya yüksəldiyi 1974/75 mövsümündə başlayan 52 illik rəqabət ərzində komandalar rəsmi və yoldaşlıq olmaqla 141 dəfə qarşılaşıb. Bu oyunların 65-də "Qalatasaray", 44-də "Trabzonspor" qalib gəlib, 32 görüş isə heç-heçə başa çatıb.
Keçirilən matçlarda "Qalatasaray" 192 qol vurub, "Trabzonspor" isə 156 dəfə fərqlənib.
"Qalatasaray" və "Trabzonspor" 2006-cı ildən etibarən Super Kubok adı ilə keçirilən turnirdə ilk dəfə üz-üzə gələcəklər. Tərəflər daha əvvəl Türkiyə çempionu ilə Türkiyə Kubokunun qalibi arasında oynanan Cumhurbaşqanlığı Kubokunda 1975/76 mövsümündə qarşılaşıb və həmin oyunda "Trabzonspor" 2:1 hesabı ilə qalib gəlib.
"Qalatasaray" "Trabzonspor"la keçirdiyi son səkkiz rəsmi matçda məğlub olmayıb. "Sarı-qırmızılı"lar bu görüşlərdə altı qələbə və iki heç-heçə əldə edib, 18 qol vurub, qapısında isə beş qol görüb.
"Qalatasaray" rəqibi üzərində ən böyük hesablı qələbələrini 21 yanvar 2024-cü ildə səfərdə 5:1 və 26 may 2001-ci ildə İstanbulda 4:0 hesabları ilə qazanıb.
"Trabzonspor" isə 1 sentyabr 2018-ci ildə Trabzonda keçirilən liqa oyununda "Qalatasaray"ı 4:0 hesabı ilə məğlub edib.
Bununla yanaşı, 15 noyabr 1998-ci ildə İstanbulda keçirilən və "Trabzonspor"un 5:3 hesablı qələbəsi ilə başa çatan oyun iki komanda arasında ən məhsuldar qarşılaşma kimi tarixə düşüb.
