Sport24.az
"Məşqlərimiz ağır keçir. Fiziki cəhətdən çox yüklənirik. Hazırlıq prosesində bu normal qarşılanmalıdır. Fikrimcə, bunun qarşılığı olaraq, mövsümün ikinci yarısında daha yaxşı"Kəpəz" görəcəksiniz". Bu sözləri Sport24.az-a açıqlamasında"Kəpəz"in futbolçusu Nicat Süleymanov deyib.
O, çempionatın geridə qalan hissəsini komandası üçün belə dəyərləndirib:
"Mövsümün geridə qalan hissəsinin əvvəli ilə sonunu müqayisə etsək, doğurdan da güclənmiş, özünəxas oyun tərzi olan "Kəpəz" gördük. İkinci dövrənin son turlarında ortaya qoyduğumuz oyunlar göstərdi ki, komanda olaraq inkişaf etdik. Bunun davamını gətirmək istəyirik".
Süleymanov ikinci dövrədə komandasından gözləntilərini açıqlayıb:
"Gələcək oyunlarla bağlı və ümumiyyətlə mövsümün ikinci yarısı üçün indidən nəsə demək düzgün olmazdı. Necə olacağını, nələrin baş verəcəyin heç kim bilmir. Qarşıdakı matçlarda maksimum nəticə göstərib turnir cədvəlində yerimizi daha da yaxşılaşdırmağa çalışacağıq. Bütün komanda olaraq bunun üçün əlimizdən gələni edəcəyik. İnanıram ki, azarkeşlərimiz də bizi bu çətin oyunlarda yalnız buraxmayacaqlar".
Qeyd edək ki, 18 turdan sonra aktivində 11 xal olan "Kəpəz" qış fasiləsinə 9-cü pillədə yollanıb.
