Idman.biz
Dünən "Milan"la müqavilə imzalamaq üçün İtaliyaya uçan "Bayer Leverkuzen"in hücumçusu Viktor Bonifasenin transferi baş tutmaya bilər.
İdman.biz xəbər verir ki, bu barədə jurnalist Saşa Tavolyeri məlumat verib.
Mənbənin bildirdiyinə görə, tibbi müayinədən sonra 24 yaşlı nigeriyalının dizində problem aşkarlanıb. Forvardla bağlı yekun qərar verməsi üçün Viktor ciddi tibbi müayinəyə göndərilib.
Qeyd edək ki, Bonifase hələ Norveçin "Bodo-Qlimt" klubunda çıxış edərkən iki dəfə çarpaz bağı qopub. 2024-cü ilin noyabrında isə "Bayer"də hücumçu bud nahiyəsindən aldığı ağır zədə səbəbindən 12 matç meydançadan kənarda qalıb. Nideriyalı forvard "Bayer"də 61 oyun keçirib, 32 qol vurub və 12 məhsuldar ötürmə edib. O, Bundesliqanın çempionu və Almaniya kubokunun qalibi olub.
İdman.biz
