Idman.biz
Türkiyənin "Fənərbağça" klubunun ispaniyalı futbolçusu Marko Asensio keçirdiyi əməliyyatdan sonra zədəsi və sağlamlıq vəziyyəti barədə açıqlama verib.
İdman.Biz xəbər verir ki, 30 yaşlı yarımmüdafiəçi bu barədə sosial şəbəkə hesabında paylaşım edib.
Asensio ötən mövsüm komandasına kömək etmək üçün sağlamlığını riskə atdığını etiraf edib:
"Ötən mövsümün qalan hissəsində meydana çıxmağıma mane olan zədə aldım. Qarşımıza qoyduğumuz məqsədin əhəmiyyətini nəzərə alaraq, komandamla birlikdə çempionluq qazana biləcəyimizə inanırdım. Gələcəkdə sağlamlığım üçün müəyyən risklər yarada biləcəyini bilsəm də, gözləniləndən daha tez meydana qayıtmaq və komandama kömək etmək üçün əlimdən gələni etdim".
İspaniyalı futbolçu son həftələrdə ağrılarının gücləndiyini və buna görə əməliyyat olunmaq qərarına gəldiyini bildirib:
"Son üç həftədə yaşadığım ağrılar oynamağıma imkan vermədi. Buna görə dayanmaq və tibbi müdaxiləyə müraciət etmək qərarına gəldik. Çətin və bəzən məyusedici proses oldu. Ancaq yenidən meydana qayıtmaq üçün böyük həvəsim var. Bu gündən etibarən komanda yoldaşlarımla birlikdə oynamaq və azarkeşlərlə yenidən görüşmək üçün çalışmağa köklənmişəm. Dəstəyinizə görə təşəkkür edirəm. Tezliklə daha güclü şəkildə görüşəcəyik".
Qeyd edək ki, sol diz oynağında qığırdaq zədələnməsi aşkarlanan Asensio İspaniyada artroskopik əməliyyat keçirib. "Fənərbağça" futbolçunun müalicə və reabilitasiya prosesinin təxminən üç ay davam edəcəyini açıqlayıb.
