La Liqanın qol statistikası – ARAŞDIRMA

İspaniya La Liqasının yeni başa çatan növbəti mövsümündə komandalar 380 oyuna 1005 qol vurublar (hər oyuna orta - 2,64 qol). Bu, ötənilkindən 50 qol çoxdur və son 6 mövsümdə ən yüksək göstəricidir.

İdman.biz cari mövsümdə La Liqanın qol statistikasını nəzərdən keçirib.

Cari mövsümdə qolların 56,2 faizini (564) meydan sahibləri, 43,8 faizini (441) qonaqlar vurublar. Meydan sahibləri hər oyuna orta 1,48, qonaqlar isə 1,16 qol vurublar. Ötən illə müqayisədə meydan sahibləri 11, qonaqlar 39 qol çox vurublar. Qol nisbətinə görə isə ev sahiblərinin qolları azalıb, qonaqların qolu artıb. Ötən mövsüm bu nisbət faizi 57,9-ün 42,1-ə olmuşdu.

38 turda ortalama hər tura 26,45 qol vurulub.

Ən çox qol 3, 6 və 13-cü turlarda vurulub (35 qol), ən az isə 30-cu turda (17) vurulub. Ən çox qol "Vilyarrel" - "Real" (4:4), "Barselona" - "Vilyarreal" (3:5), "Jirona" - "Malyorka" (5:3) və "Real Sosyedad" - "Qranada" (5:3) matçlarında vurulub. Ən böyük hesablı ev və səfər qələbələri 7 cavabsız qolla əldə edilib. "Jirona" evdə "Qranada"ya 7:0 hesabı ilə qalib gəldiyi halda, Madrid "Atletiko"su səfərdə "Rayo Valyekano"nu bu hesabla üstələyib.

Çempionatın ən məhsuldar komandası Madrid "Real"ıdır – 87 qol (hər oyuna orta – 2,29). Bu, "Kral klubu"nun elə özünə məxsus 12 il əvvəlki rekorddan 34 qol azdır, ancaq elə eyni kluba məxsus bir il əvvəlki mövsümün ən yüksək göstəricisindən 12 qol çoxdur.

Cari mövsümdə "Jirona" 85, "Barselona" 79 qol vurub.

Evdə ən çox qol "Jirona"dadır – 53 (hər oyuna orta – 2,79). "Real" 48, "Barselona" 43 qol vurub.

Səfərdə ən çox fərqlənən "Real"dır – 39 (orta – 2,05). "Barselona" 36, "Jirona" 32 qol vurub.

Bu mövsüm ən az qol vuran "Kadis"dir – 26 qol (0,68). Evdə və səfərdə də ən az qol bu kluba məxsusdur – müvafiq olaraq 16 (0,84) və 10 (0,53).

Bu mövsüm qapısını ən yaxşı qoruyan "Real" 26 qol (0,68) buraxıb. "Atletik"i rəqibləri 37, "Real Sosyedad"ı 39 dəfə məyus ediblər.

Evdə "Real" cəmi 9 qol (0,47) buraxıb. "Valensiya" 14, "Malyorka" 16 dəfə məyus olub.

Səfərdə "Real" qapısında 17 top (0,89) görüb. "Real Sosyedad" və "Atletik"də bu rəqəm 19-dur.

Müdafiənin ən zəifi "Qranada"dır. Son pillənin sahibi ümumi 79 (2,08), səfərdə 47 (2,47) qol buraxıb. Evdə ən çox qol buraxan "Almeriya"dır – 36 (1,89).

Ən yaxşı top fərqi "Real"dadır – ümumi +61, evdə +39, səfərdə +22. Cəmisi 7 komandanın müsbət balansı var.

Ən pis top fərqi ümumi (-41) və səfərdə (-33) "Qranada"dır. Evdə ən zəif göstərici "Almeriya"ya məxsusdur (-14).

Vüqar Məmmədov