Sport24.az
"Mançester Yunayted"in hücumçusu Mateus Kunya "Arsenal"la oyunda (3:2) qələbə qolunu vuran zaman sevincini qeyd etməsi ona baha başa gələ bilər. Sport24.az xəbər verir ki, braziliyalı futbolçu cərimə meydançası xaricindən vurduğu baxımlı qoluna sevinərkən emosiyalarına hakim ola bilməyib.
O, kameraya yaxınlaşaraq qeyri-etik ifadələr və söyüşlər səsləndirib.
Futbolçunun səsi canlı yayımda aydın eşidildiyi üçün matçı yayımlayan "Sky Sports" kanalının şərhçisi dərhal tamaşaçılardan üzr istəməli olub.
İngiltərə Futbol Assosiasiyasının (FA) reqlamentinə əsasən, təhqiramiz və kobud ifadələr, eləcə də bu cür jestlər qırmızı vərəqə və ya sonradan tətbiq edilən cəza üçün əsas sayılır. İntizam Komitəsinin video görüntüləri araşdırdıqdan sonra Kunyaya diskvalifikasiya cəzası verəcəyi gözlənilir.
Xatırladaq ki, vaxtilə oxşar hərəkətə görə, kameraya qarşı nalayiq ifadələr işlətdiyinə görə "Mançester Yunayted"in əfsanəsi Ueyn Runi 2 oyunluq cəzalandırılmışdı. İndi Kunyanı da eyni aqibət gözləyə bilər.
