Idman.biz
"Araz-Naxçıvan" klubunun baş məşqçisi Elmar Baxşıyevin qarşılıqlı razılıq əsasında vəzifəsinə xitam verilməsi barədə məlumat vermişdik.
Lakin İdman.Biz-in əldə etdiyi məlumata görə, bu, düzgün informasiya deyil və əslində, Elmar Baxşıyev klubdan qovulub.
Qeyd edək ki, bir müddət bundan öncə Baxşıyevin qarşılıqlı razılaşma ilə müqaviləyə xitam verilməsi təklifini qəbul etmədiyi və 75 min manat məbləğində kompensasiya istəməsi barədə məlumat yayılmışdı.
Daha sonra mütəxəssis İdman.Biz-ə açıqlamasında həmin xəbəri təkzib etmişdi. O, bu məsələ ilə bağlı nə hər hansı təklif aldığını, nə də ümumiyyətlə klubla aralarında belə söhbət getdiyini vurğulamışdı. Baxşıyev bu cür xəbərlərin kimlər tərəfindənsə vaxtaşırı uydurduğunu söyləmişdi.
16:20
Misli Premyer Liqasında baş məşqçi istefası gerçəkləşib.
İdman.Biz xəbər verir ki, "Araz-Naxçıvan" rəhbərliyi Elmar Baxşıyevlə yolları ayırıb.
Belə ki, bu gün klubdaxili iclas keçirilib. Mövsümün birinci yarısında göstərilən nəticələr ürəkaçan olmadığı üçün təcrübəli mütəxəssislə qarşılıqlı razılıq əsasında müqaviləyə xitam verilib.
Məlumat üçün əlavə edək ki, E.Baxşıyevin Naxçıvan təmsilçisi ilə anlaşması 2026-cı ilin yayına qədər idi.
