Sport24.az
"Toplanış normal keçir. Futbolçular istirahətdən qayıdır. Fasilə az olduğundan inanıram ki, tonusdan düşməmişik. Hələ çempionatın startına təxmini 1 həftə vaxtımız var. Bundan da ən yaxşı şəkildə istifadə etməyə çalışacağıq". Bu sözləri Sport24.az saytına açıqlamasında "Şamaxı"nın baş məşqçisi Ayxan Abbasov deyib.
Mütəxəssis toplanış çərçivəsində "Sabah"la keçiriləcək yoxlama görüşündən də söz açıb: "Yoldaşlıq görüşlərində nəticə ikinci planda olur. Düzdür, bu da bir oyundur və qələbə qazanmaq istəyirik. Üç hissəli oyun keçirəcəyik. Hər kəsin oyun dəqiqəsinin, praktikasının eyni olmasını istəyirik. Məqsəd oyun yükünü almaq və məşqdə çalışdıqlarımızı həyata keçirməkdir".
Qeyd edək ki, "Şamaxı" ötən gün fasilən dönəmində ilk yoxlama keçirib. "Zirə" ilə qarşılaşan "Şirlər" 1:3 hesabı ilə məğlub olub.
