Portuqaliya Kubokunda keçirilən "Portu" - "Paredes" matçında qeyri-adi avtoqol qeydə alınıb.
Oxu.Az xəbər verir ki, qarşılaşmanın 57-ci dəqiqəsində "Portu"nun müdafiəçisi Fransisko Moura topu uzaqlaşdırmaq istəyərkən onu öz qapısına göndərib.
Bu səhv futbolçunu ciddi şəkildə sarsıdıb. Moura göz yaşlarına hakim ola bilməyib. Maraqlısı odur ki, həm komanda yoldaşları, həm də rəqib futbolçular ona yaxınlaşaraq təsəlli veriblər.
Moura səhvindən sonra əvəzlənməsini istəyib və 70-ci dəqiqədə meydanı tərk edib.
Qeyd edək ki, görüşün əsas vaxtı 1:1 hesabı ilə başa çatıb. Penaltilər seriyasında 3:1 hesabı ilə qalib gələn "Portu" növbəti mərhələyə yüksəlib.