Report.az
Gürcüstanın Batumi şəhərində keçirilən Avropa çempionatının (EBSL) B Liqasının qalibi olan Azərbaycan millisi öz gücünü göstərib.
Bu barədə "Report"a komandanın baş məşqçisi Sahib Məmmədov açıqlama verib.
O, turnirdə birinci yeri tutmaları ilə bağlı fikirlərini bölüşüb:
"Təəssüratlarımız olduqca müsbətdir. Avropa çempionatının B Liqasında birinci pillənin sahibi olmuşuq. Yarışa yollanmamışdan öncə bu nəticəni əldə edəcəyimizə əmin idik. Kağız üzərində də ən güclü komanda məhz biz hesab olunurduq. İnamımız da böyük idi. Potensialımızı ortaya qoyduq və çempion olduq. Yeganə hədəfimiz birinci yeri tutmaq idi".
S.Məmmədov A Liqasına vəsiqə qazanmalarına da toxunub:
"Orada Avropanın ən güclü yığmaları mübarizə aparır. Ciddi hazırlaşmalıyıq. 1/4 final, yarımfinal mərhələsinə çıxa bilərik. Niyə də finalda iştirak etməyək?"
Xatırladaq ki, Azərbaycan millisi finalda Latviya yığmasını 4:0 hesabı ilə məğlub edib.
