Report.az
"Atletiko" argentinalı hücumçu Xulian Alvaresin transferi ilə bağlı "Real"ın 150 milyon avroluq təklifindən imtina edib.
"Report" xəbər verir ki, bu barədə "Kral klubu"nun mətbuat xidməti məlumat yayıb.
Məlumata görə, "Real"ın direktorlar şurasının iclasında Alvaresin hüquqlarının €150 milyona alınması barədə qərar qəbul edilib, lakin Madridin digər təmsilçisi "Atletiko" oyunçunun satınalma bəndinə istinad edərək təklifi rədd edib.
Qeyd edək ki, 26 yaşlı Xulian Alvares 2024-cü ildən "Atletiko Madrid"in heyətində çıxış edir. Daha əvvəl hücumçu İngiltərənin "Mançester Siti" klubunda oynayıb və bu komandanın tərkibində iki dəfə İngiltərə çempionu (2023, 2024), bir dəfə Çempionlar Liqasının (2023), klublararası dünya çempionatının (2023) qalibi, ölkə kubokunun (2023) və superkubokunun (2024), UEFA Superkubokunun (2023) sahibi olub.
Argentina millisinin heyətində Alvares 51 oyun keçirib, bu görüşlərdə 14 qol vurub və 4 məhsuldar ötürmə edib. Hücumçu milli komanda ilə birlikdə 2022-ci il dünya çempionatını, Amerika kubokunu (2021, 2024) və Finalissimanı (2022) qazanıb.
Xatırladaq ki, mayın 29-da İspaniyanın "Barselona" klubu argentinalı hücumçu Xulian Alvares üçün "Atletiko"ya 100 milyon avroluq rəsmi təklif göndərib.
