Report.az
Azərbaycan III MDB Oyunlarında çövkən yarışlarının favoritidir.
"Report"un Şəkiyə ezam olunmuş əməkdaşının məlumatına görə, bunu çövkən üzrə Qazaxıstan millisinin üzvü Adilxan Hasenov Türkiyə ilə matçdan sonra deyib.
O, Azərbaycanı çempion kimi görür:
"Çövkən oyunlarının əsas favoriti kimi Azərbaycanı görürük. Düşünürəm ki, çempion olacaqlar. Qırğızıstan, Özbəkistan və Qazaxıstan da güclü komandalardır".
Mütəxəssis Türkiyə ilə matç haqqında da danışıb:
"Oyun çox çətin keçdi. Türkiyə əla oynadı və bizə müqavimət göstərdi. Hesab 3:0 olsa da, çətinliklə qələbə qazandıq. Üstəgəl hava şəraiti elə də yaxşı deyildi. Məmnunam ki, hər şey yaxşı keçdi, insanlardan və ya atlardan xəsarət alan olmadı".
İdmançı təşkilatçılıq baxımından hər şeyin yaxşı olduğunu söyləyib:
"Təşkilatçılıq baxımından hər şey əladır və xoşumuza gəlir. Belə bir yeri ilk dəfədir görürük. Bundan əvvəl Bakıda olmuşuq. Bakı da xoşumuza gəlmişdi. Burada öz atmosferi, təbiəti, dağları var. Çempionatı burada təşkil etmək əla ideya idi".
Qeyd edək ki, Qazaxıstan yığması bu gün keçirilən görüşdə Türkiyəni 3:0 hesabı ilə məğlub edərək yarımfinala yüksəlib. Çövkən yarışlarına oktyabrın 7-də yekun vurulacaq.
III MDB Oyunları Qazaxıstan Türkiyə
